უეფას პრეზიდენტი მიშელ პლატინი თავისი ფიფელი კოლეგის, ზეპ ბლატერის განცხადებას გამოეხმაურა მუნდიალზე აფრიკულ და აზიურ ნაკრებთა წარმომადგენლობის გაზრდის თაობაზე. ორიოდ დღის წინათ ბლატერმა განაცხადა, რომ მსოფლიო ჩემპიონატებზე ევროპელთა ხარჯზე აფრო-აზიელთა წარმომადგენლობა უნდა გაიზარდოს. პლატინიმ კი მას ახალი ვარიანტი შესთავაზა: ევროპელებს დარჩეთ თავისი რაოდენობა და მონაწილეთა რიცხვი 32-დან 40-მდე გაიზარდოს. ასეთი ფორმულა, შესაძლოა, უკვე 2018 წლის მუნდიალზე მოისინჯოს, რომელიც რუსეთში გაიმართება. თუ შეიქმნება რვა 5 გუნდიანი ჯგუფი, ტურნირი მხოლოდ 3 დღით ”გაიწელება.”

“ვეთანხმები ბლატერს, რომ აფრიკას და აზიას მეტი წარმომადგენლები სჭირდება, მაგრამ ევროპული გუნდების შემცირების მაგიერ, სჯობს მონაწილეთა რიცხვი 40-მდე გავზარდოთ. 2-2 ნაკრები დავუმატოთ აფრიკიდან, აზიიდან და ამერიკიდან, თითოც ოკეანიიდან და ევროპიდან,” – უთხრა პლატინიმ The Times-ს.