ოთხშაბათს საქართველოს სპორტისა და ახალგაზრდობის საქმეთა მინისტრმა ლადო ვარძელაშვილმა ევროპის ჩემპიონატიდან დაბრუნებულ ჭაბუკ ძიუდოისტებს უმასპინძლა. შეგახსენებთ, მალტის ქალაქ კოტონერაში 24-26 ივნისს ჩატარებულ ევროპირველობაზე, საქართველოს ჭაბუკთა ნაკრებმა 7 მედალი მოიპოვა და გუნდურ ჩათვლაში მეორე ადგილი დაიკავა. გიორგი ვაზაგაშვილის გაწვრთნილი გუნდიდან ვანო მამისაშვილი (55 კგ) და ბექა ღვინიაშვილი (81 კგ) ჩემპიონები გახდნენ. თამაზ კირაკოზაშვილი (60 კგ), შალვა ჩოჩელი (90 კგ) და გიორგი ლაზუაშვილი (+90 კგ) ფინალში დამარცხდნენ და ვერცხლის მედალს დასჯერდნენ, ლევან გუგავამ (73 კგ) და გურამ თუშიშვილმა (90 კგ) კი ბრინჯაოს მედლები მოიპოვეს.