“გოლდენ სტეიტმა” ახალბედა ჰარისონ ბარნსის ბრწყინვალე თამაშის შედეგად “სან ანტონიოს” ოვერტაიმში სძლია 97:87 და სერიაში ანგარიშიც გაათანაბრა 2:2.

“სპურსმა” მატჩი ძალიან კარგად დაიწყო და ტიმ დანკანის ზუსტი ტყორცნების შედეგად 11:6 დაწინაურდა, თუმცა დევიდ ლის და ენდრიუ ბოგატის სამწამიან ზონაში აქტიური თამაშის შედეგად “ვორიორზმა” ჩამორჩენა მალე გააბათილა. მეოთხედის მიწურულს პარკეტზე არგენტინელი მანუ ჯინობილი გამოჩნდა, რომელმაც ბოლო 4 წუთში ერთბაშად 11 ქულა უთავაზა მეტოქეს და “სან ანტონიოც” 26:19 გაიქცა.

Mმეორე პერიოდში მასპინძლებმა პერიმეტრი მძლავრად აამუშავეს, ჯარეტ ჯეკი და სტეფ კარი მონაცვლეობით ბომბავდნენ მეტოქის კალათს და სტუმართა ჰანდიკაპმაც ნელ ნელა დნობა დაიწყო. “სპურსის” ფრანგი გამთამაშებელი ტონი პარკერი სრულიად ამოვარდა სათამაშო ტემპიდან და არაერთი არასწორი გადაწყვეტილება მიიღო, რითაც გააცოფა გრეგ პოპოვიჩი, რომელიც არაერთხელ შემოუვარდა ღრიალით პარკეტზე.

ტაიმის მიწურულს ისევ უბერებელმა ტიმ დანკანმა ითავა გუნდის ლიდერობა, მან მიჯრით 4 ქულა აიღო, შემდეგ შესანიშნავად უპასა ახალგაზრდა კავაი ლეონარდს, რომელსაც “ლეი აფით” ჩაგდება აღარ გასჭირვებია და “სან ანტონიო” დიდ შესვენებაზე მაჟორულ ნოტაზე გავიდა 45:37.

მატჩის მეორე ნახევარიც უშეღავათო ბრძოლაში წარიმართა. სტეფ კარის აშკარად ეტყობოდა, რომ  წინა შეხვედრაში მიღებული ტრავმა აწუხებდა, იგი ძალიან მძიმედ გადაადგილდებოდა და მხოლოდ პოზიციური შეტევებისას თავისი ავანტიურული სამქულიანებით თუ ეხმარებოდა საკუთარ გუნდს. Gგრეგ პოპოვიჩის გადაწყვეტილებით “სპურსი” მეტოქის ავსტრალიელ ცენტრ ბოგატზე ტაქტიკურ ფოლებს იღებდა, რადგან ენდრიუ საჯარიმო ხაზიდან საშინელი მაჩვენებლით ისვრის სერიის მიმდინარეობისას (6-19). Aასე რომ “ვორიორზის” დამრიგებელ მარკ ჯექსონს მისმა ოპონენტმა ეს კოზირიც გამოაცალა ხელიდან.

მეოთხე მეოთხედის დასრულებამდე 4:49 წუთით ადრე სტუმრები კომფორტული, 8 ქულიანი სხვაობით გახლდნენ წინ, როდესაც “გოლდენ სტეიტის” რიგებში “აფეთქდა” ახალბედა ჰარისონ ბარნსი, რომელმაც გადამწყვეტ მომენტში ულიდერა საკუთარ გუნდს და დაეხმარა შეხვედრა ოვერტაიმში გადაეყვანათ, სადაც უკვე მასპინძლები უდიდეს ფსიქოლოგიურ უპირატესობას ფლობდნენ და “სპურსს” წარმატებაზე ფიქრის არანაირი შანსი არ დაუტოვეს.საბოლოოდ 97:87 “ვორიორზის” უმნიშვნელოვანესი გამარჯვება.

შეხვედრის გმირი ჰარისონ ბარნსი გახდა, რომლის ანგარიშზეც 26 ქულა და 10 მოხსნა იყო, აღსანიშნავია “ცალი ფეხით” მოთამაშე სტეფ კარის გარჯა, რომელმაც 10 მცდელობიდან 5 სამქულიანი ჩააგდო და მატჩი  22 ქულით დახურა. “სან ანტონიოს” რიგებში კი საუკეთესონი ტიმ დანკანი (19 ქულა, 15 მოხსნა) დას მანუ ჯინობილი იყვნენ (21 ქულა).

გოლდენ სტეიტი – სან ანტონიო 97:87 (19:26, 18:19, 23:17, 24:22, 13:3)

გოლდენ სტეიტი: კარი (22), ტომფსონი (10), ბოგატი (5), ლენდრი (6), ბარნსი (26+10მ); ლი, ეზელი (1), ჯეკი (24), გრინი (3), ბიედრინში, ჯეფერსონი

სან ანტონიო: პარკერი (17), გრინი (10), სპლიტერი (5), დანკანი (19+15მ0, ლეონარდი (11); დიაუ, ჯინობილი (21), ჯოზეფი (2), ნილი (2), ბონერი

სერიის ანგარიში 2:2