იტალიის სერია B-ში მოასპარეზე “ემპოლიმ”, სადაც ქართველი ფეხბურთელები ლევან მჭედლიძე და ირაკლი შეყილაძე გამოდიან, 2013 წელი გამარჯვებით დაასრულა.

21-ე ტურში, “ემპოლი” “პესკარას” ესტუმრა და 2:1 გაიმარჯვა. მჭედლიძე და შეყილაძე 18-კაციან განაცხადში იყვნენ – პირველი მათგანი მოედანზე 86-ე წუთზე მასიმო მაკარონეს ნაცვლად შევიდა, ხოლო მეორეს თამაში არ მოუწია. აღსანიშნავია, რომ 49-ე წუთზე, როდესაც “ემპოლი” 1:0 იგებდა, სტუმრებს ლორენცო ტონელი გაუძევეს. “პესკარამ” ანგარიში 52-ე წუთზე გაათანაბრა, მაგრამ კაცნაკლულმა “ემპოლიმ” 72-ეზე გადამწყვეტი გოლი გაიტანა. “ემპოლის” 39 ქულა აქვს და მეორე ადგილზე იმყოფება, ჩამორჩება რა ერთი ქულით “პალერმოს”.

თურქეთის სუპერლიგის მე-17 ტურში, “ქაისერისფორმა”, რომლის ღირსებასაც ზურაბ ხიზანიშვილი იცავს, სტუმრად “ფენერბახჩესთან” 1:5 წააგო. ქართველმა მცველმა შეუცვლელად ითამაშა და 62-ე წუთზე ყვითელი ბარათი მიიღო. “ქაისერმა” თავი მხოლოდ 12 ქულას მოუყარა და 18 გუნდში ბოლოსწინაა.