“ბარსელონას” არგენტინელი ცენტრალური მცველი ხავიერ მასკერანო მიიჩნევს, რომ კატალონიური კლუბის ჩამოწერა არცერთ ტურნირზე არ შეიძლება.

ესპანეთის ჩემპიონატის გასულ ტურში, “ბარსა” “ვალიადოლიდთან” დამარცხდა და ტატა მარტინოს გუნდი ლიდერ “რეალს” 4 ქულით ჩამორჩება. კატალონიელებს, ჩემპიონთა ლიგაზე, საქმეები უკეთ მისდით – 1/8-ფინალის პირველ მატჩში, “ბარსამ” “სიტი” მანჩესტერში ანგარიშით 2:0 დაამარცხა.

“ყოველ მატჩს ინდივიდუალურად უნდა მივუდგეთ, რადგან ყველა მათგანი ძალიან მნიშვნელოვანია. რა თქმა უნდა, წაგების შემდეგ გუნდის კრიტიკა ადვილია. ბოლო 5-6 წლის განმავლობაში დავამტკიცეთ, რომ მოგების სურვილი არ დაგვიკარგავს. ტიტულებისთვის ყოველთვის ვიბრძოდით და ხშირად ვიგებდით კიდეც. ესპანეთის სუპერთასი უკვე მოვიგეთ და მიმაჩნია, რომ “ბარსას” ჩამოწერა არც სხვა ტურნირებიდან შეიძლება.” – ციტირებს მასკერანოს სიტყვებს UEFA-ს ოფიციალური ვებგვერდი.