იტალიის ფეხბურთელთა ეროვნული ნაკრებისა და “მილანის” თავდამსხმელი მარიო ბალოტელი გაძარცვეს. მას საიუველირო ნაწარმი, საათი და ავტომანქანა მოპარეს.

იტალიური პრესის ცნობით, დანაშაული რამდენიმე დღის წინა მოხდა, მაგრამ მის შესახებ ცნობილი ახლა გახდა. ლიმიდო-კომასკოში მდებარე ბალოტელის სახლი საღამოს “გატეხეს”, როდესაც ფეხბურთელი თავის ძმასთან ერთად გარკვეული ხნით გასული იყო.

სახლში დაბრუნებულმა ბალოტელიმ აღმოაჩინა, რომ რამდენიმე ათასი ევროს ღირებულების ოქროს ნაკეთობები და საათი აღარ იყო. მძარცველებმა ფეხბურთელის Porsche Carrera S-იც გაიტაცეს, რომელიც მოგვიანებით პოლიციელებმა იპოვეს.