ვლადიკავკაზის “ალანიას” თავდამსხმელი ოთარ მარცვალაძე ინტერნეტგამოცემა onedivision.ru-ს ვერსიით, რუსეთის საფეხბურთო პირველი დივიზიონის მე-9 ტურის სიმბოლურ ნაკრებში მოხვდა.

“კიდევ ერთი ისტორია ინდივიდუალურ ოსტატობასა და ჟინზე. ოთარი ბურთზე თამამად წავიდა, მცველი ჩამოიცილა და საქმე მოაგვარა. მხოლოდ ის დარჩენოდა, რომ კარგად დაერტყა და ამ მხრივ მარცვალაძეს ყველაფერი წესრიგში აქვს. “ალანიას” შეტევა ამუშავდა. მთავარია ტრავმები არ ჰქონდეს და ასეთ შემთხვევაში ეს თავდამსხმელი ბევრს გაიტანს”, – იუწყება მარცვალაძის შესახებ onedivision.ru, რომელიც რუსეთის პირველ დივიზიონს ყველაზე აქტიურად აშუქებს და ავტორიტეტულ გამოცემად ითვლება.

შეგახსენებთ, რომ მე-9 ტურში “ალანიამ” შინ ვოლგოგრადის “როტორს” 2:1 მოუგო და 50-ე წუთზე მარცვალაძემ ანგარიში 2:0 გახადა. ეს “ალანიას” რიგებში მის მიერ გატანილი პირველი გოლია. ვლადიკავკაზელთა რიგებში ქართველმა ფეხბურთელმა მხოლოდ 2 მატჩი ჩაატარა.