“მანჩესტერ იუნაიტედის” ხელმძღვანელობა ჰოლანდიის ეროვნული ნაკრების მთავარ მწვრთნელ ლუი ვან გაალთან მოლაპარაკებას აწარმოებს. როგორც Mirror-ი იყობინება, ინგლისური კლუბის მფლობელი გლეიზერების ოჯახის წარმომადგენელი რამდენიმე დღის წინ შეხვდა ჰოლანდიელ სპეციალისტს და შესაძლო თანამშრომლობაზე ესაუბრა. თავის მხრივ, 62 წლის მწვრთნელიც დაინტერესებულია მანჩესტერელთა წინადადებით, მით უმეტეს - მსოფლიოს 2014 წლის ჩემპიონატის შემდეგ ჰოლანდიის ნაკრებს ტოვებს.

ცნობილია, რომ “იუნაიტედის” ხელმძღვანელობა გუნდის ამჟამინდელი მწვრთნელის დევიდ მოიესის მუშაობით უკმაყოფილოა და “ოლდ ტრაფორდზე” მის პირველ სეზონს წარუმატებლად აფასებს. ინგლისელი ჟურნალისტები მიიჩნევენ, რომ შოტლანდიელს სამსახურის დაკარგვისგან ლეგენდარული თანამემამულის, სერ ალექს ფერგიუსონის მხარდაჭერაც ვერ იხსნის.

ვან გაალთან თანამშრომლობით მხოლოდ “მანჩესტერ იუნაიტედი” არაა დაინტერესებული. ჰოლანდიელი სპეციალისტის მიმართ ინტერესს იჩენს “ტოტენჰემიც”. თუმცა, ინგლისური პრესა ვან გაალის და “იუნაიტედის” შეთანხმების შესაძლებლობას უფრო რეალურად მიიჩნევს.