“მალაგას” ოფიციალური ვებგვერდის ცნობით, ანდალუსიური გუნდი UEFA-სგან დისკვალიფიკაციის ერთი წლით გახანგრძლივებას გადაურჩა.
როგორც ცნობილია, “მალაგას” ევროტურნირებზე ერთწლიანი დისკვალიფიკაცია აქვს. ამის მიზეზი ისაა, რომ კლუბს ფეხბურთელების სახელფასო დავალიანება ჰქონდა. გარდა ამისა, UEFA-ს მიერ არსებობდა დათქმა, რომლის თანახმადაც, თუ “მალაგა” 2013 წლის 31 მარტამდე დავალიანებას სრულად არ დაფარავდა, დისკვალიფიკაციას კიდევ ერთი წელი დაემატებოდა.
როგორც გაირკვა, “მალაგამ” ფინანსური პრობლემები მოაგვარა, შედეგები UEFA-მ შეამოწმა და დაადასტურა, რომ ანდალუსიელებს დისკვალიფიკაციის მომატება აღარ ემუქრებათ.
არც ისაა გამორიცხული, “მალაგას” დისკვალიფიკაცია სრულად რომ მოეხსნას. როგორც ცნობილია, ესპანელებს UEFA-ს გადაწყვეტილება სპორტულ არბიტრაჟში აქვთ გასაჩივრებული.
