დასრულდა ევროპის ჩემპიონატი თავისუფალ და ბერძნულ-რომაულ ჭიდაობაში, რომელსაც თბილისის სპორტის სასახლე 6 დღის განმავლობაში მასპინძლობდა. ბოლო მედალი ბერძნულ-რომაულ ჭიდაობაში 84 კგ წონით კატეგორიაში გათამაშდა, სადაც საქართველოს წარმომადგენელი ვლადიმერ გეგეშიძე მე-2 ადგილზე გავიდა.

“მსოფლიო სპორტი” ვლადიმერ გეგეშიძეს, საქართველოს ჭიდაობის ფედერაციის პრეზიდენტ ლუკა კურტანიძეს და მსოფლიო ჩემპიონ მიხეილ სალაძეს ესაუბრა.

ვლადიმერ გეგეშიძე: მეტის მიღწევა და ფინალის მოგებაც შემეძლო, მაგრამ ვერცხლის მედლით კმაყოფილი ვარ, თუ გავითვალისწინებთ, რომ ჩემს წინაშე ტიტულოვანი რუსი მოჭიდავე გამოდიოდა.  

- კონკრეტულად რა მომენტში შეგეძლო მოგება?

- იყო მომენტი, მაგრამ ახლა ამაზე საუბარს აზრი არ აქვს. დავმარცხდი და მე-2 ადგილი დავიკავე.

ლუკა კურტანიძე: საქართველომ ამ ჩემპიონატზე მთლიანობაში კარგი შედეგი აჩვენა. ტურნირის ორგანიზებით კმაყოფილი დარჩა როგორც ევროპის, ისე მსოფლიო ჭიდაობის ფედერაციის ხელმძღვანელები. შედეგებიდან გამომდინარე თავისუფალ ჭიდაობაში გატარებულმა ცვლილებებმა გაამართლა, სადაც 2 ოქროსა და 2 ბრინჯაოს მედალი მოვიპოვეთ. შედარებით უკმაყოფილო ვარ ბერძნულ-რომაულ ჭიდაობაში, სადაც მხოლოდ 2 ვერცხლისა და ერთი ბრინჯაოს მედალი ავიღეთ.  

მიხეილ სალაძე: სამწუხაროდ, ბერძნულ-რომაული ჭიდაობა ამ ბოლო დროს სანახაობრივად ისეთი არ არის, როგორც ადრე იყო. აუცილებელია ცვლილებების გატარება, რომელიც მსოფლიოს ჩემპიონატისთვის განხორციელდება. იგეგმება, რომ ეს ჭიდაობა უფრო სანახაობრივი გახდეს. არ მეგონა, თუ საქართველოში ჭიდაობა ასე უყვარდათ. დარბაზი თითქმის სავსე იყო, ახალგაზრდების მოსვლამ გამახარა. ეტყობა, ახალგაზრდობას არ დაუკარგავს ინტერესი სპორტის ამ სახეობისადმი.