2011 წელს შინაურ კედლებში გამართულ ევროპის ჩემპიონატზე ლიტვის ნაკრებმა მეოთხედფინალს მიღმა ვერ გააღწია, სლოვენიაში მიმდინარე ევრობასკეტზე კი საწადელი აისრულა და საუკეთესო ოთხ გუნდს შორის მოხვდა.

იონას კაზლაუსკასის შეგირდებმა ლიუბლიანაში იტალიის ეროვნულ გუნდს 81:77 სძლიეს და 2013 წლის ევროპირველობის ნახევარფინალში ხომ გააღწიეს, ამასთან, მომავალი მსოფლიოს ჩემპიონატის საგზურიც გაინაღდეს.

გასულ დაპირისპირებას 8 ათასზე მეტი ქომაგი დაესწრო, რომელთა შორის ლეგენდარული ლიტველი კალათბურთელი არვიდას საბონისიც გახლდათ. ცხადია, საბოლოო შედეგით იგი ძალიან კმაყოფილი დარჩებოდა.

ბალტიისპირელთა გამარჯვება საწყისი და უკანასკნელი მეოთხედების მაღალ დონეზე ჩატარებამ განაპირობა, იტალია კი სწორედ მაშინ მოდუნდა, როდესაც თავის ბოლომდე გადადება იყო საჭირო.

აპენინელებმა დასკვნითი პერიოდის საწყის 6 წუთში (!) ქულაც კი ვერ აიღეს, ლიტვამ კი 15:0 “გაქცევა” მოაწყო და მართალია, დარჩენილ დროში აპენინელებმა ძალიან მოინდომეს, არსებული ჩამორჩენის აღმოფხვრა, ფაქტობრივად, შეუძლებელი გახლდათ.

სტატისტიკისთვის თვალის ერთი გადავლებაც საკმარისია იმის აღსანიშნავად, რომ ლიტველთა გამარჯვება ძირითადად ფარზე უპირატესობამ განაპირობა. იტალიელებმა მხოლოდ 25 მოხსნა განახორციელეს, მაშინ, როდესაც ბალტიისპირელებმა მხოლოდ საკუთარ ფარზე 29 ბურთი მოხსნეს, ჯამში კი აქტივში 38 მოხსნა ჰქონდათ.

ამ მხრივ განსაკუთრებით თავი კალნიეტისმა და სეიბუტისმა გამოიჩინეს. მათ ჯამურ  აქტივში 13 მოხსნა ჰქონდათ, ამას გარდა კი 17-17 ქულა ჩააგდეს და გამარჯვებულთა რიგებში საუკეთესონი იყვნენ. იტალიელებს 22 ქულით ბელინელიმ ულიდერა, რომელმაც მოედანზე 36 წუთი გაატარა. ისიც ვთქვათ, რომ პიანიჯიანიმ განაცხადში მყოფი 12 კალათბურთელიდან მხოლოდ 9 დაასაქმა და ამასთან, ერთ-ერთი მათგანი როსელი – სიმბოლურად, 2 წუთით.

20 სექტემბერს ნახევარფინალებში ლიტვა ხორვატიას ეთამაშება, ხოლო ესპანეთის მეტოქე საფრანგეთი იქნება. დღესვე მეხუთე-მერვე ადგილებისთვის მატჩში იტალიის ნაკრები უკრაინას დაუპირისპირდება.  

ლიუბლიანა. “სტოჟიცე არენა”. 8210 მაყურებელი

ლიტვა – იტალია 81:77 (22:15, 18:24, 17:19, 24:19)

ლიტვა: კალნიეტისი (37 წ. 17 ქ. 7 მ. 5 პ.), დ.ლავრინოვიჩი (27 წ. 9 ქ. 5 მ.), მაჩიულისი (31 წ. 13 ქ. 4 მ. 5 პ.), სეიბუტისი (28 წ. 17 ქ. 6 მ.), კლეიზა (25 წ. 5 ქ. 5 მ.); მოტეიუნასი (17 წ. 7 ქ. 3 მ.), კუზმინსკასი (4 წ.), კ.ლავრინოვიჩი (1 წ.), პოჩიუსი (20 წ. 11 ქ. 3 მ.), ვალანჩიუნასი (11 წ. 2 ქ.).

მწვრთნელი: იონას კაზლაუსკასი.

იტალია: არადორი (23 წ. 6 ქ.), ბელინელი (36 წ. 22 ქ.), კუზინი (24 წ. 4 ქ. 8 მ.), დატომე (37 წ. 10 ქ. 3 მ.), ჩინჩიარინი (21 წ. 11 ქ. 3 პ.); ჯენტილე (27 წ. 15 ქ.), როსელი (2 წ.), მელი (16 წ. 2 ქ.), დინერი (15 წ. 7 ქ.).

მწვრთნელი: სიმონე პიანიჯიანი.