“მანჩესტერ სიტის” კოტ დ’ივუარელ ცენტრალურ მცველს, კოლო ტურეს “ქალაქელებთან” კონტრაქტი მიმდინარე სეზონის ბოლოს ეწურება, მაგრამ აფრიკელი უკანახაზელის მომავალთან დაკავშირებით, ცნობილი ჯერ არაფერია.

მიმდინარე სეზონში, მანჩინი ტურეს ხშირად არ ათამაშებს, მაგრამ ბოლო დროს, კომპანის არყოფნაში, კოტ დ’ივუარელს მოედანზე გამოსვლის შანსი ეძლევა ხოლმე და ისიც თავს არ ირცხვენს.

კოლო ტურეს მომავალთან დაკავშირებით დასმულ კითხვას მანჩინი შემდეგნაირად პასუხობს: “დაგვტოვებს თუ არა კოლო ტურე ზაფხულში? მცირეხნიანი შვებულება მეც მექნება. ახლა კი სერიოზულად – ამჟამად, მის მომავალთან დაკავშირებით არაფრის თქმა არ შემიძლია. მთავარი ისაა, რომ კოლო შესანიშნავად თამაშობს.

კოტ დ’ივუარელი ნამდვილი პროფესიონალია და ის შესაბამის პატივისცემას იმსახურებს. მომავალში მის თამაშს დავაკვირდებით.” – ციტირებს მანჩინის სიტყვებს Sky Italia.