კიევის “დინამომ” საფრანგეთის ეროვნული საფეხბურთო ნაკრების მარცხენა მცველი ბენუა ტრემულინასი შეიძინა. უკრაინული კლუბის ვებგვერდის ცნობით, 27 წლის ფრანგმა კიეველებთან 4-წლიანი კონტრაქტი გააფორმა.

ტრემულინასი აქამდე “ბორდოში” თამაშობდა, სადაც 2007 წლიდან ჩატარებულ 165 მატჩში 5 გოლი გაიტანა. მან ჟირონდელებთან ერთად საფრანგეთის ჩემპიონატი, თასი, ლიგის თასი და სუპერთასი მოიგო. ბენუას საფრანგეთის ნაკრებში 3-ჯერ უთამაშია.

France Football-ის ცნობით, კიეველებს ტრემულინასის შეძენა 6-დან 7 მილიონამდე ევრო დაუჯდათ.