უაღრესად საინტერესო და დაძაბული გამოდგა აღმოსავლეთ კონფერენციის ნახევარფინალური ეტაპის რიგით მეექვსე მატჩი, რომელშიც "ინდიანამ" საკუთარ არენაზე "ნიუ იორკს" უმასპინძლა და ბრწყინვალე გუნდური თამაშის წყალობით 106:99 იმარჯვა. "პეისერზმა" სერია 4:2 მოიგო და შემდეგი ეტაპის საგზურიც გაიფორმა.

წინა მატჩისგან განსხვავებით, "ინდიანას" დაუბრუნდა ძირითადი გამთამაშებელი ჯორჯ ჰილი (ტვინის შერყევა), რომელსაც მედიკოსებმა ბოლო მომენტში მისცეს თამაშის უფლება. სწორედ მისი და პოლ ჯორჯის ზუსტი სამქულიანებით დაწინაურდნენ შეხვედრის სტარტზე მასპინძლები, თუმცა "ნიქსის" რიგებში თავგამოდებით იბრძოდა რეგულარული სეზონის ბომბარდირი კარმელო ენტონი, მან საწყის 12 წუთში მეტოქეს 12 ქულა უთავაზა და პირადად მისი დამსახურებაა, რომ სტუმრებმა დიდი სხვაობით არ წააგეს პირველი მეოთხედი - 27:29.

მეორე პერიოდი ოგუსტინის ზუსტი შორეული ტყორცნით გაიხსნა, თუმცა ჯერ კოუპლენდმა უპასუხა ანალოგიურით, შემდეგ სმიტმა გამოიყენა ზუსტად ორი საჯარიმო და ანგარიშიც გათანაბრდა - 32:32.

"პეისერსის" სამწვრთნელო შტაბმა იგრძნო რა საშიშროება, იმწამსვე პარკეტზე დააბრუნა როი ჰიბერტი, რომელიც მთელი სერიის განმავლობაში ერთ ერთი საუკეთესო გახლდათ. მან ამჯერადაც ყველანაირი პრობლემების გარეშე დაჯაბნა პირად დუელში ტაისონ ჩენდლერი და კენიონ მარტინი. "ნიუ იორკის" მაღლები ცდილობდნენ ორმაგი მეურვეობა დაეწესებინათ როიზე, თუმცა ამ შემთხვევაში უკვე დავიდ ვესტი რჩებოდა თავისუფალი, რომელიც საშუალო დისტანციებიდან მაღალი პროცენტული მაჩვენებლით ისროდა (50%). ამ ფაქტორთა გათვალისწინებით "ინდიანა" ისევ დაეუფლა სათამაშო უპირატესობას და ანგარიშში 10-ქულიანი ჰანდიკაპითაც გავიდა წინ - 52:42.

მესამე მეოთხედში მაიკ ვუდსონის შეგირდებმა ნამდვილი სპექტაკლი დადგეს. კარმელო ენტონიმ ზედიზედ 9 ქულის დაგროვება შესძლო, რის შემდეგაც აიმან შამპერტმა აიწყვიტა. მან ერთ წუთში თითქმის დაუჯერებელი შეძლო და 3 სამქულიანი უთავაზა მეტოქეს, ჯეი არმაც ერთი ზუსტი შორეული ტყორცნაც მიაყოლა და ანგარიში გათანაბრდა - 81:81.

უკანასკნელი პერიოდი ნერვების თამაშად იქცა. ვერცერთი გუნდი ვეღარ ახერხებდა მნიშვნელოვანი უპირატესობით წინ გასვლას. "მელო" კი თავის მხრივ განაგრძობდა საკუთარი გუნდის ლიდერობას და ქულების დაგროვებას.

მატჩის გარდამტეხი მომენტი საფინალო სირენამდე 5 წუთით ადრე მოხდა, როდესაც როი ჰიბერტმა "არანორმალური" დაფარება შემოგვთავაზა ენტონიზე და დროულად გამოაფხიზლა საკუთარი გუნდი. ამჯერად უკვე ლენს სტივენსონის "დრო დადგა", რომელმაც "აიწყვიტა" და პირადად მოუწყო მცირე გაქცევა მეტოქეს, რომელიც საბოლოო ჯამში გადამწყვეტიც გამოდგა. 106:99 - "ინდიანამ" დამსახურებული გამარჯვება მოიპოვა სერიაში (4:2) და აღმოსავლეთ კონფერენციის ფინალში მოქმედ ჩემპიონ "მაიმის" დაუპირისპირდება.

შეხვედრის საუკეთესო მოთამაშე სტივენსონი გახდა, რომელმაც კარიერის პირადი რეკორდი დაამყარა, ჩაუგდო რა მეტოქეს 25 ქულა. ძალიან სასარგებლო გახლდათ როი ჰიბერტი, მის ანგარიშზე ამჯერადაც ორმაგი დუბლი გახლდათ - 21 ქულა, 12 მოხსნა. სტუმართა რიგებში კი ყველაზე გამორჩეული კარმელო ენტონი იყო 39 ქულით, აიმან შამპერტმა პერიმეტრიდან ექვსჯერ გაისროლა და ხუთმა მათგანმა მიზანს უწია.

დღევანდელ მატჩში "ინდიანას" სასტარტო ხუთეულის ყველა წევრმა შეძლო მინიმუმ 12 ან მეტი ქულის დაგროვება.

მიმდინარე სეზონში "ნიუ იორკმა" Life fieldhouse arena-ზე 5 სტუმრობიდან ყველა წააგო.

"ინდიანამ" აშკარად დაჩაგრა მეტოქე მოხსნებში - 43:36.

"ნიუ იორკის" მეორე ხუთეულმა კონფერენციის ნახევარფინალური სერიის განმავლობაში გაანადგურა "პეისერსის" სათადარიგოთა სკამიდან შემოსული კალათბურთელები - 187:89, თუმცა ეს საკმარისი არ გამოდგა წარმატებისთვის.

დასრულებულ სერიაში ყველაზე შედეგიანი კარმელო ენტონი გახლდათ 171 ქულით, ხოლო "ინდიანას" რიგებიდან პოლ ჯორჯი - 117.

კვლავ უქულოდ დაასრულა შეხვედრა ვეტერანმა ჯეისონ კიდმა, რომლის მშრალი სერიაც 21 აპრილიდან გრძელდება.

ინდიანა - ნიუ იორკი 106:99 (29:27, 26:20, 26:34, 25:18)

ინდიანა: ჰილი (12), სტივენსონი (25+10მ), ჰიბერტი (21+12მ), ვესტი (17), ჯორჯი (23); ტ.ჰენსბრო, ოგუსტინი (3), იანგი (5), მაინმი

ნიუ იორკი: ფელტონი (2), პრიჟიონი (6), ჩენდლერი (2), ენტონი (39), შამპერტი (19); სმიტი (15+10მ), მარტინი (5), კიდი, კოუპლენდი (9), სტადემაირი (2)

ინდიანამ მოიგო სერია 4:2