მადრიდის „რეალის“ იტალიელი მთავარი მწვრთნელი ესპანელ ჟურნალისტებს შეხვდა და მათ კითხვებს უპასუხა. აპენინელმა სპეციალისტმა საკუთარი თავი ვისენტე დელ ბოსკეს მიამსგავსა და გარეთ ბეილთან დაკავშირებით გულშემატკივარს მოთმინებისკენ მოუწოდა.
- მადრიდში ცხოვრება მოგწონთ?
- მომწონს. ესპანელები იტალიელებს გვანან, რასაც ვერ ვიტყვი ფრანგებზე. ისინი ნაკლებად პოზიტიურები და ოპტიმისტები არიან.
- „სანტიაგო ბერნაბეუს“ პუბლიკაზე რას იტყოდით?
- მადრიდში სტადიონზე მეტად მომთხოვნი გულშემატკივარი მოდის. ეს „რეალის“ პირველივე მატჩზე ვიგრძენი. სხვანაირად შეუძლებელიცაა – „ბლანკოსს“ უდიდესი და მეტად მდიდარი საფეხბურთო ისტორია აქვს. ქომაგთა მომთხოვნელობა კი სათამაშო მოტივაციას გვიმაღლებს.
- „რეალის“ ფეხბურთელთაგან ყველაზე მეტად რომელმა მათგანმა გაგაოცათ საქმისადმი მიდგომითა და სათამაშო დონით?
- კრიშტიანუ რონალდუს პროფესიონალიზმმა გამაოცა. პორტუგალიელი მეტად სერიოზულად უდგება საქმეს, ნებისმიერ დეტალს დიდ ყურადღებას უთმობს. სწორედ კრიშტიანუ ამაღლებს პარტნიორთა მოტივაციას და მატჩის მსვლელობისას თანაგუნდელებს დახმარების ხელს უწოდებს.
- რამდენიმე სახელოვან კლუბში გიმუშავიათ. სამწვრთნელო კარიერის განმავლობაში ყველაზე მეტად რომელ ფეხბურთელთან გსიამოვნებდათ საქმიანი ურთიერთობა?
- კრიშტიანუ რონალდუსთან. იგი არა მარტო ბრწყინვალე ფეხბურთელი და პროფესიონალია, მოედნის გარეთაც გულისხმიერი და დამყოლი ადამიანია.
- თქვენი ნება რომ იყოს, „ოქროს ბურთს“ ვის მიანიჭებდით?
- „ოქროს ბურთის“ კრიშტიანუსთვის მიკუთვნების მომენტი დადგა. რონალდუ ამას ლეო მესისა და ფრანკ რიბერიზე მეტად იმსახურებს.
- უფრო მეტად ვის გავხართ – ჟოზე მოურინიოს თუ ვისენტე დელ ბოსკეს?
- დაუფიქრებლად გიპასუხებთ – დელ ბოსკეს.
- ფლორენტინო პერესი სასტარტო შემადგენლობის დაყენებისას რჩევას ხომ არ გაძლევთ?
- პერესი სილვიო ბერლუსკონიში აგერიათ...
- კიდევ რამდენი ხანი დაგჭირდებათ, „თქვენი“ „რეალის“ ასაწყობად?
- ბოლო ხანს მეტ ყურადღებას ვუთმობთ ბურთის კოლექტიურ ართმევას, გუნდმა თამაშს უმატა და იმედი მაქვს, პროგრესი უფრო დიდი ტემპით წავა.
- ჩაბი ალონსოს დაბრუნების შემდეგ რა შეიცვლება?
- ჩაბის დაბრუნებით „რეალის“ თამაში გაძლიერდება. ილიარამენდი მინდორზე თავის მოვალეობებს კარგად უძღვება, მაგრამ იგი ჯერ ახალგაზრდაა და ამ დონეზე გამოსვლის სათანადო გამოცდილება აკლია.
- გარეთ ბეილი მასზე გაცემულ ავანსს ამართლებს?
- უელსელს ახალ გარემოსთან საბოლოოდ გასაშინაურებლად კიდევ გარკვეული დრო დასჭირდება. მას თავად სურდა „რეალში“ გადმოსვლა, მიუხედავად იმისა, „ტოტენჰემი“ უფრო მაღალ ხელფასს რომ ჰპირდებოდა.
- სეზონის ბოლომდე დიეგო ლოპესი პრიმერა დივიზიონის მატჩებში, იკერ კასილასი კი ჩემპიონთა ლიგაზე დაიცავს „რეალის“ კარს?
- ეს საბოლოო გადაწყვეტილებაა და არ შეიცვლება.
