დღეს საღამოს საფეხბურთო სამყაროს მეტად საინტერესო საფეხბურთო პაექრობა ელის. ჟოზე მოურინიოს “ჩელსი” მიმდინარე ინგლისურ პრემიერლიგაში პირველ საგარეო მატჩს ჩაატარებს – მანჩესტერის “ოლდ ტრაფორდზე” დევიდ მოიესის “იუნაიტედს” დაუპირისპირდება.

 - “მანჩესტერ იუნაიტედის” წინააღმდეგ თამაშის დიდი გამოცდილება გაქვთ. ამჯერად რას ელოდებით “ოლდ ტრაფორზე” ჩასატარებელი მატჩისგან?

- სერ ალექს ფერგიუსონის გუნდთან “პორტუ”, “ჩელსი”, “ინტერი” და “რეალი” გამიყვანია. შედეგი სხვადასხვა იყო – “იუნაიტედისთვის” მომიგია, დავმარცხებულვარ, “მშვიდობითაც” დავშორებულვარ. განსაკუთრებით დასამახსოვრებელი მანჩესტერელთა წინააღმდეგ ჩატარებული საჩემპიონთალიგო შეხვედრებია. ამ დაპირისპირებებში გამარჯვებითაც გამიხარებია და წაგებითაც დამწყვეტია გული. საბედნიეროდ, მანჩესტერელთათვის უფრო ხშირად მომიგია, ვიდრე დავმარცხებულვარ, მაგრამ ერთი რამ უდაოა – “იუნაიტედის” წინააღმდეგ თამაში ჩემთვის დიდი სიამოვნებაა. გასულ სეზონში “მანჩესტერს” ჩემპიონთა ლიგის პლეი ოფის პირველსავე სტადიაზე შევხვდით. კარგად მახსოვს, როგორი დაძაბულები იყვნენ მადრიდის “რეალის” ქომაგები ორრაუნდიანი დაპირისპირების წინ. საბედნიეროდ, მაშინ მომდევნო სტადიაზე გუნდის გაყვანა მოვახერხე. მომწონს რთული მატჩები და მოწინააღმდეგეები. ორშაბათსაც უშეღავათო პაექრობას ველი.

- მანჩესტერელთა წინააღმდეგ გამოსვლისას ყველაზე მეტად რომელი შეხვედრა დაგამახსოვრდათ?

- მაშინ “პორტუს” ვედექი სათავეში და პირველად მომიწია “იუნაიტედის” და სერ ალექსის ოპონენტობა. ბოლო წუთზე მნიშვნელოვანი გოლი გავიტანეთ და შესაძლოა, ამიტომაც ის მატჩი ჩემთვის დაუვიწყარია.

- ამჯერად “მანჩესტერს” სერ ალექს ფერგიუსონი არ გაუძღვება...

- ფერგიუსონის სამწვრთნელო კარიერა საუკუნეების განმავლობაში შემორჩება საფეხბურთო ისტორიას. შესაძლოა, ბევრი ამას დევიდ მოიესის პრობლემადაც თვლიდეს, მაგრამ “იუნაიტედის” ამჟამინდელი მთავარი მწვრთნელი ამბიციური სპეციალისტი და ადამიანია და მისტერ დევიდი რთულ გამოცდას კარგად ჩააბარებს.

- სატრანსფერო ფანჯრის დახურვამდე სულ რაღაც ერთი კვირაღა დარჩა. “ჩელსიში” ახალი ფეხბურთელების გამოჩენას უნდა ველოდეთ?

- მაქსიმუმ 2 ახალ მოთამაშესთან გავაფორმოთ კონტრაქტი. რამდენიმე ფეხბურთელს ჩვენგან წასვლა სურდა, მაგრამ მათ ამ განზრახვაზე ხელი ავაღებინე. საერთოდ, დამრიგებელი მოთამაშეს მუდმივად უნდა აკონტროლებდეს, იცოდეს მისი ფიქრის და ზრუნვის საგანი. ამ შემთხვევაში ფეხბურტელი მწვრთნელს ყურადღებას კარგი თამაშით აუცილებლად გადაუხდის.