როგორც იცით, ევროპის ლიგის I საკვალიფიკაციო ეტაპზე ქუთაისის "ტორპედო" სლოვაკეთის თასის ფინალისტ "ჟილინას" შეხვდება - 4 და 11 ივლისს. პირველი მატჩი ქუთაისში გაიმართება. აქვე, ჟილინელთა მწვრთნელისა და ფეხბურთელების კომენტარები:

ადრიან გულია (მწვრთნელი): "საინტერესო მეტოქეა და ვფიქრობ, დიდ პრობლემას შეგვიქმნის. "ტორპედომ" ჩემპიონატი მესამე ადგილზე დაასრულა, თუმცა ჩვენ შევეცდებით, ყველანაირად მომზადებულნი შევხვდეთ მატჩებს".

ტომაშ მაიტანი (ფორვარდი): "იოლ გასეირნებას არ ველით. მახსოვს "ბანსკა ბისტრიცას" მატჩები "ზესტაფონთან". მაშინ გავვარდით. კიდევ ის მახსოვს, რომ საქართველოში ძალიან ცხელოდა. ვფიქრობ, პირველი მატჩი ბევრს გადაწყვეტს".

ვიქტორ პეჩოვსკი (ნახევარმცველი, გუნდის კაპიტანი): "პირველი ეტაპი აუცილებლად უნდა გადავლახოთ. ვინც უნდა იყოს მეტოქე, "ჟილინა" ვალდებულია, რომ იბრძოლოს და შემდეგ ეტაპზე გავიდეს".

შეხსენებისთვის, თუ "ტორპედო" "ჟილინას" ბარიერს გადალახავს, II საკვალიფიკაციო ეტაპზე სლოვენიის "ოლიმპიას" შეხვდება.

ისე, ევროპის ლიგაში ბოლო ორი ქართულ-სლოვაკური დაპირისპირება ჩვენთვის იღბლიანად დასრულდა: "ვიტ ჯორჯიამ" 2009 წელს ტრნავის "სპარტაკი" გამოთიშა (სტუმრად 2:2, შინ 1:0) ტურნირს, "ზესტაფონმა" კი 2010 წელს "ბანსკა ბისტრიცას" სძლია (შინ 3:0, სტუმრად 0:1).