ირაკლი მოდებაძე ის ფორვარდია, რომელიც საქართველოს 19 და 21-წლამდელთა ნაკრებში უალტერნატივო გახლდათ, მუდმივად თამაშობდა და გოლებიც გაჰქონდა. 18 წლის იყო, ზაპოროჟიეს “მეტალურგის” ერთ-ერთი წამყვანი ფეხბურთელი რომ გახდა და ინგლისის “ლიდსს” გაუტანა. იმდროინდელ “ლიდსს” ჯერ კიდევ შენარჩუნებული ჰქონდა მრისხანება, პრემიერლიგის ლიდერთა ჯგუფში იმყოფებოდა. შემდეგ ირაკლის საქმეები უკან-უკან წავიდა, ბევრი გაუცდა ტრავმის გამო და ისე მოხდა, რომ საქართველოს ეროვნულ ნაკრებში ადგილი ვერ დაიმკვიდრა.
26 წლის ტანმაღალი და სწრაფი მოდებაძე ამჟამად რუსთავის “ოლიმპშია” და ჩემპიონატის საუკეთესო ბომბარდირია. სეზონი კარგად ვერ დაიწყო, მაგრამ მერე და მერე მოუმატა, რაც “ჯვაროსნების” თავკაცმა თემურ ქეცბაიამაც დაუფასა და 17 ნოემბერს სლოვენიასთან ამხანაგური მატჩისთვის გამოიძახა. დაკვირვებული თვალი ვარჯიშებზეც გამოარჩევს, რომ კარგ ფორმაშია.
“ძალიან გამიხარდა, როცა თემურ ქეცბაიასგან გამოძახება შევიტყვე. ვეცდები, თავი არ შევირცხვინო”, - თქვა ირაკლიმ “მსოფლიო სპორტთან” საუბარში.
- სლოვენიასთან მატჩი შენთვის შანსი იქნება ნაკრებში დასამკვიდრებლად.
- ეს ვარჯიშებზე უნდა დავამტკიცო. ჯერ ხომ არ ვიცი, მომიწევს თუ არა სლოვენიაში წასვლა და თამაში. ისე კი, რა თქმა უნდა, ამ შანსს უნდა ჩავეჭიდო. ქვეყნის მთავარი ნაკრების სახელით გამოსვლა უდიდესი შეგრძნებაა.
- ეროვნულ ნაკრებში გითამაშია კიდეც, ოღონდ ამხანაგურ მატჩებში...
- დიახ, 2006 წელს კლაუს ტოპმიოლერის მწვრთნელობისას ბოლო 5-10 წუთი ვითამაშე გერმანიის ნაკრებთან (როცა ქარ¬თველებმა 0:2 წააგეს – რედ.). იმ დღეებში გერმანიის “ჰანზასთანაც” (0:0) ვითამაშე.  
- ნაკრებს სწრაფი ფორვარდი სჭირდება. შენ ცენტრფორვარდად უფრო გირჩევნია თამაში, თუ უკანდაწეულ თავდამსხმელად?
- არ ვიცი, ეს მწვრთნელის გადასაწყვეტია. მთავარია, შეტევაში ვითამაშო.
- შეადარე შენი თავი უკრაინის ჩემპიონატში თამაშისას და ახლა.
- ახლა უფრო სტაბილურად ვარ, რაც ალბათ, ასაკის გამოცაა. უკრაინაში რომ გადავედი, პატარა ვიყავი, ტრავმებს ხშირად ვიღებდი და სტაბილურად ვერ ვთამაშობდი.
- სლოვენიის ნაკრებზე რამის თქმა შეგიძლია?
- რამდენადაც ვიცი, უფრო დაცვით ფეხბურთს თამაშობენ. ისე კი, შედეგებიდანაც ეტყობათ, რომ კარგი ნაკრები ჰყავთ.  

ილია ნანობაშვილი