24 წლის ნახევარმცველი ირაკლი მაისურაძე ამჟამად უგუნდოდაა. მას გორის "დილასთან" კონტრაქტი დაუმთავრდა და გუნდს თურქულ შეკრებაზე არ ახლდა. ირაკლი ამჟამად თბილისშია და სად გააგრძელებს კარიერას, ჯერ უცნობია. "მსოფლიო სპორტი" მაისურაძეს დაუკავშირდა – ფეხბურთელმა პრობლემატურ საკითხებზე გაამახვილა ყურადღება:
- უკრაინულ პრესაში დაიწერა, მაისურაძე კიევის "არსენალში" გაისინჯებაო.
- გავიგე ასეთი რამ, მაგრამ ჭორი იყო და ჭორადვე დარჩა.
- ეს პერიოდი სად ემზადებოდით?
- ინდივიდუალურად ვვარჯიშობდი. რაღაც ვარიანტები მაქვს და ველოდები.
- "დილაში" დარჩენა ხომ შეგეძლოთ?
- უკეთეს ვარიანტს ველოდები. იმედი მაქვს და ვნახოთ. სიმართლე გითხრათ, რამდენიმე გუნდზეა საუბარი, მაგრამ დაკონკრეტებას მოვერიდები. არ ვმალავ, უბრალოდ, ჯერ არც არის საქმე იქამდე მისული, რომ გადაწყვეტით ვილაპარაკო.
- საქართველოს ეროვნულ ნაკრებში არცთუ იშვიათად გიძახებენ და იმედია, მაინცდამაინც აზერბაიჯანის სუსტ გუნდში, ან სომხეთის ჩემპიონატში არ წახვალთ.
- სომხეთი გამორიცხულია, მაგრამ ჩვენს ჩემპიონატთან შედარებით, აზერბაიჯანს რა აქვს დასაწუნი?
- აზერბაიჯანის წამყვან, სამეულის გუნდებზე არ ვამბობ. სუსტ კლუბებზე ვთქვი.
- მე ვფიქრობ, ხუთეულიც ნორმალურია.
- საქართველოში 2011 წლის დასაწყისში გამოჩნდით – რუსთავის "მეტალურგში" ბელარუსიდან ჩამოხვედით. ბელარუსში ისე წახვედით, რომ საქართველოში თითქმის არ გითამაშიათ. არ ჩანდით. რატომ?
- ადრეც მითქვამს, მაგრამ კიდევ ვიტყვი: არავის არ გამოუჩენია ინტერესი. საქართველოში მწვრთნელებს ჰგონიათ, რომ ფეხბურთელის ამოცნობა ერთ წამში შეუძლიათ. აქ ხომ ფერგიუსონები და მოურინიოები გვყავს...…ზოგს ჰგონია, რომ 16-17 წლის ბიჭი უნდა დაფრინავდეს, მაგრამ რეალობამ გვაჩვენა, რომ ფეხბურთელი ამ ასაკში არ ყოფილა ძლიერი და შემდეგ გამოუჩენია თავი. შანსი ყველას უნდა მიეცეს, დღეს კი თქვენც იცით, როგორი პრობლემაა ახალგაზრდა ქართველი მოთამაშისთვის კლუბის მოძებნა. სინჯებზე მისვლაც კი პრობლემაა. მეც ასე მომექცნენ: ეგრეთ წოდებულმა ქართულმა გრანდებმა დამიწუნეს, თანაც ისე, რომ წესიერად არც გავუსინჯივარ. ყველაზე ცუდი ისაა, რომ ჭკუასაც ვერ სწავლობენ. მარტო მე კი არა, ბევრს აქვს ეს პრობლემა. მე მხოლოდ ზღვაში წვეთი ვარ. კიდევ ერთი ცნობილი ფრაზა: “უკვე დაკომპლექტებულები ვართ”. კი მაგრამ, იქნებ სჯობნი გუნდში უკვე მოხვედრილს? ორი-სამი ვარჯიშის ნახვას რა უნდა? ბევრი არაკომპეტენტური ადამიანია ქართულ ფეხბურთში.
