სპლიტის “ჰაიდუკმა” ტესტ-მატჩში 2:3 წააგო კორეულ “გიონგნამთან”. ხორვატული გუნდიდან ერთი გოლი გიორგი ილურიძემ გაიტანა, კერძოდ, 67-ე წუთზე კუასი-მაგლიცას კომბინაცია დაასრულა. ამ გოლამდე, “ჰაიდუკი” 0:3-ს აგებდა. გიორგიმ შეუცვლელად ითამაშა.

კახა ცხადაძის გაწვრთნილმა ბაქოს “ინტერმა” გერმანული ბილეფელდის “არმინიასთან” 2:2 ითამაშა. ოთხივე ქართველი (გიორგი ლომაია, ბაჩანა ცხადაძე, ლაშა სალუქვაძე, ალექსნადრე იაშვილი) სასტარტოში გახლდათ. 87-ე წუთზე გავიდა მატჩის ბოლო გოლი, რომელიც ბაჩანა ცხადაძის ანგარიშზეა: მან პენალტი გამოიყენა. 

კვიპროსზე შოთა გრიგალაშვილის “ანორთოსისმა” ჩემპიონატის ტურში, შინ ვერ სძლია “კუკლიონს”- 2:2. მასპინძლები აგებდნენ და მსაჯის მიერ დამატებულ წუთებზე გაათანაბრეს. გრიგალაშვილმა ბოლო ნახევარი საათი დაჰყო მინდორზე. “ანორთოსისი” მეხუთე საფეხურზეა.

საფრანგეთის მესამე ლიგაში “ლუზენაკმა” გასვლაზე 2:0 აჯობა “პერონასს” და ლიდერობს. მეორე გოლი ქართველმა მცველმა ამირან სანაიამ გაიტანა. 24 წლის ფეხბურთელი, როგორც იცით, საქართველოს ეროვნულ ნაკრებშიც თამაშობდა. სანაიას 18 წლის ასაკში ჰქონდა დებიუტი კლაუს ტოპმიოლერის გუნდში, შემდეგ კი ექტორ კუპერიც ათამაშებდა. 

იტალიის სერია B-ში “ემპოლიმ” გასვლაზე 1:2 წააგო “ლატინასთან” და მეორე ადგილზე დარჩა. ლევან მჭედლიძე განაცხადში იყო და არ უთამაშია, ხოლო ირაკლი შეყილაძე 18-კაციან სიაში არ გახლდათ.

ყაზანის “რუბინმა” მეორებუნდესლიგელ “პადერბონთან” 1:2 წააგო. საბა კვირკველიამ სასტარტოში ითამაშა და შესვენებისას შეცვალეს, ხოლო 20 წლის ფორვარდმა მერაბ ურიდიამ მეორე ტაიმი დაჰყო მოედანზე. “რუბინმა” პირველი ტაიმი 1:0 მოიგო და შემდეგ გაუშვა გოლები.