სპლიტის “ჰაიდუკმა” ხორვატიის ჩემპიონატში შინ 1:0 სძლია “ზადარს” და ეს ერთადერთი გოლი ქართველმა გიორგი ილურიძემ გაიტანა. 21 წლის ნახევარმცველმა მე-10 წუთზე გახსნა ანგარიში - 7-8 მეტრიდან დარტყმით. ილურიძე მხოლოდ მეორე მატჩს ატარებდა დალმაციურ კლუბში და უკვე გამოიჩინა თავი, თანაც, მშვენივრად ითამაშა იმ 62 წუთის განმავლობაში, რაც მინდორზე დაჰყო.

საინტერესოა, რომ გიორგის გოლის წყალობით, “ჰაიდუკი” ლიდერი გახდა, თუმცა ზაგრების “დინამოს” ხვალ აქვს სათამაშო და სხვაობა მათ შორის 2 ქულაა. 

ბელარუსის ჩემპიონატში ბრესტის “დინამომ” გასვლაზე 3:1 აჯობა “ნაფტანს” და მოგებულთაგან ერთი გოლი 90-ე წუთზე უჩა გოგოლაძემ მიითვალა. ბრესტელები ქვედა ექვსეულში მეორე ადგილზე არიან - იქ ქვედა და ზედა ექვსეულების სისტემაა.       

როგორც იცით, პორტუგალიაში გამოჩნდა საინტერესო ქართველი ფეხბურთელი - შემტევი ნახევარმცველი ავთო ებრალიძე, რომელმაც პრიმიერა ლიგაში გასულ კვირას “პორტუს” წინააღმდეგ ბოლო 15 წუთი ითამაშა. “ჟილ ვისენტეს” 21 წლის ქართველი ამჯერად სასტარტოში იყო “ოლიალენსესთან” საშინაო შეხვედრაში, რომელიც 1:1 დასრულდა. ებრალიძემ 70-ე წუთამდე ითამაშა და მისი გუნდი 1:0-ს იგებდა, მაგრამ მსაჯის მიერ დამატებულ წუთებზე გაათანაბრეს სტუმრებმა, რომლებსაც პორტუგალიის ნაკრების ყოფილი მცველი, ესტრავაგანტული აბელ შავიერი წვრთნით.

პორტუგალიური ონლაინ-რეპორტაჟის ცნობით, ებრალიძე რამდენიმე მწვავე შეტევაში მონაწილეობდა, თუმცა გოლი, ან საგოლე პასი არ მიუთვლია. 5 ტურის შემდეგ, “ჟილ ვისენტე” მეშვიდე ადგილზეა.

http://hajduk.hr/vijest/poljud-hajduk-zadar-1-0/4052