1 ოქტომბრიდან ფუტსალში საქართველოს საუკეთესო კლუბი “იბერია სტარი” უეფა-ს თასის ძირითად რაუნდში ჩაებმება და ელიტ-რაუნდში გასასვლელად იბრძოლებს. საქართველოს ჩემპიონისთვის აღნიშნული ეტაპის დაძლევა სირთულე არასოდეს ყოფილა, თუმცა, გუნდში ბოლო ხანს მომხდარი არასასიამოვნო ძვრების გამო, ახლა, ყველაფერი გაცილებით რთული იქნება.

შეგახსენებთ, რომ ფინანსური პრობლემების შედეგად, გარკვეული პერიოდი “იბერია სტარის” არსებობაც კი ეჭვის ქვეშ იდგა, საბოლოოდ კი, ქართული კლუბი ყველა ლეგიონერმა დატოვა და გუნდი ახალ მიზნებს მხოლოდ ადგილობრივი კადრებით შეეჭიდება. არადა, გასულ სეზონში საქართველოს ჩემპიონმა “ოთხთა ფინალში” ითამაშა და სამომავლოდ კიდევ უფრო დიდი იმედები ჩაგვისახა...

ძირითადი რაუნდის წილისყრის შედეგებით, “იბერია სტარი” მე-2 ჯგუფში მოხვდა, სადაც მეტოქეებად ბულგარული “ვარნა”, ბოსნია-ჰერცეგოვინას წარმომადგენელი “სარაევო” და უნგრული “დიორი” იქნებიან.

მატჩებს დიორის “მაგვასი მიჰალი სპორტს ჰოლი” უმასპინძლებს. 1 ოქტომბერს, თბილისის დროით 18:30 საათიდან “იბერია სტარი” “ვარნას” ეთამაშება, 2-ში იგივე დროს – “სარაევოს”, 4-ში, 21:30 საათზე კი ჯგუფის ფავორიტებად მიჩნეული გუნდების – “დიორის” და “იბერია სტარის” დაპირისპირება იქნება.

ცნობისთვის, ფუტსალის ქართველ ქომაგს მომავალი მატჩების პირდაპირი რეპორტაჟების ხილვა “იბერია სტარის” ოფიციალურ ვებ-გვერდზე შეეძლება - http://www.iberiastar.ge/tv/

აქვე ვთქვათ, ძირითადი რაუნდის 6 ჯგუფიდან ელიტ-რაუნდში ორ-ორი საუკეთესო გუნდი გააღწევს, ამდენად, მომავალ ეტაპზე 12 საუკეთესო იასპარეზებს.

“იბერია სტარი” ევროპულ ასპარეზზე ასეთი შემადგენლობით წარსდგება: 1. ერნესტ აკოპოვი, 3. ალექსანდრე ძაბირაძე, 4. მურთაზ კაკაბაძე, 5. ზურაბ ლუკავა, 7. გიორგი ალთუნაშვილი (კაპ.), 8. ირაკლი თოდუა, 9. გიორგი თოთლაძე, 10. ვახტანგ ჯვარაშვილი, 11. ლაშა სიგუნავა, 12. თორნიკე ბუკია, 17. გაგა თიბილაშვილი, 20. გიორგი ტიკურიშვილი.