ხორვატიის ნაკრების მთავარი მწვრთნელი, იასმინ რეპეშა ჟურნალისტებთან ურთიერთობისას ორიგინალური სტილით გამოირჩევა. ის, არა მარტო არ გაურბის ჩემს კოლეგებთან საუბარს, არამედ თავად მოვა და გკითხავს - როგორ ხართ,რით დაგეხმაროთ და ა.შ. თუმცა, ამას ის ნაწილობრივ ხუმრობით აკეთებს, მაგრამ მისი ასეთი დამოკიდებულება საინტერესოა.ლაშკოდან ლიუბლიანაში მატარებლით გამგზავრების წინ სასტუმრო „თერმანა ლაშკოში“ რომ ვნახე, ხუმრობით შევძახე - „ხორვატია, ჩემპიონ“- მეთქი. იასმინმა მაგრძნობინა, რომ მიხვდა ჩემ ხუმრობას და იმავდროულად გამოთქვა სურვილი ჩემთან საუბარზე.

- გილოცავთ, ჯგუფიდან გასვლას, თუმცა ეს იოლი არ იყო თქვენთვის, გჯეროდათ, რომ გახვიდოდით შემდეგ ეტაპზე?

-დიდი მადლობა. ვიცოდით, რომ ძალიან რთული ჯგუფი იყო და ყველა მეტოქესთან ბოლომდე ბრძოლა იქნებოდა საჭირო. ჩვენმა გუნდმა შედეგიანად იბრძოლა და ჯგუფში წარმატებას მიაღწია.

- საქართველოს ნაკრებთან კინაღამ წააგეთ...როგორ შეაფასებდით ჩვენი ნაკრების თამაშს?

- საქართველოს ძალიან კარგი გუნდი ჰყავს, საინტერესო და გამოცდილი კალათბურთელები არიან თქვენს ნაკრებში, მაგრამ პატარა სკამი გაქვთ, ძირითადი დატვირთვა 7 მოთამაშეზე მოდის. თქვენ ევრობასკეტზე არ გყავდათ ორი ძლიერი კალათბურთელი - ფაჩულია და შენგელია, ორივეს თამაში ვიცი და ამიტომ ვამბობ. ევრობასკეტის ჯგუფურ ეტაპზე ჩვენი გუნდების თამაში ერთ-ერთი ყველაზე ლამაზი, დაძაბული და დრამატული იყო. ორივე გუნდს შეეძლო გამარჯვება.თქვენმა ნაკრებმა სლოვენიასთანაც ძალიან კარგად ითამაშა, თუმცა ბოლო წუთზე წააგო. ამის შემდეგ კი საქართველო კიდევ ორჯერ დამარცხდა. სამწუხაროა,რომ თვენი ნაკრები ჯგუფიდან ვერ გავიდა, თუმცა ამის შანსი ჰქონდა.

ბოლოს კი ბატონმა რეპეშამ მითხრა: ვიცი, რომ საქართველოში ძალიან უყვართ ფეხბურთი და კალათბურთი, ისიც ვიცი, რომ10 წლის წინათ ხორვატი სპეციალისტი - ივო შუშაკი იყო თბილისის „დინამოსა“ და ცოტა ხნით საქართველოს საფეხბურთო ნაკრების მთავარი მწვრთნელი და რომ მას პატივს სცემენ საქართველოშიო.

თენგიზ პაჭკორია, ლაშკო-ლიუბლიანა, სპეციალურად www.worldsport.ge-სთვის

ხათუნა გაბიტაშვილის ფოტოები

ევრობასკეტ-2013-ს წარმოგიდგენთ ონლაინ-ტოტალიზატორი TBILISIBET.COM და სპორტული ეკიპირების ესპანური ბრენდი Joma