ბაქოს “ინტერში” გადასვლის შემდეგ, ალექსანდრე იაშვილმა ოფიციალურ მატჩებში პირველი ჰეთ თრიქი შეასრულა.

აზერბაიჯანის საფეხბურთო თასის 1/8-ფინალში “ინტერმა”, რომელსაც კახა ცხადაძე თავკაცობს, თავის მოედანზე პირველლიგელი “შუშა” 7:0 დაამარცხა. იაშვილი მასპინძელთა სასტარტო შემადგენლობაში იყო და ანგარიში 27-ე წუთზე გახსნა. 32-ე წუთზე მან თანაგუნდელები ორი ბურთით დააწინაურა, ხოლო 62-ეზე ქართველი შემტევის დარტყმის შემდეგ, ანგარიში 6:0 გახდა. იაშვილის გარდა პირველი წუთიდან მოედანზე იმყოფებოდა ლაშა სალუქვაძეც. გიორგი ლომაია თადარიგში იჯდა, ხოლო ბაჩანა ცხადაძე ტრავმირებულია.  

1/4-ფინალშია აგდამის “ყარაბაღი”, რომელმაც შინ აზალ-ს 1:0 სძლია. ნიკა გელაშვილი აგდამელთა 18-კაციან განაცხადში იმყოფებოდა, მაგრამ თამაში არ მოუწია.

ზაქათალის “სიმურგი”, რომლის მთავარი მწვრთნელი გიორგი ჩიხრაძეა, პირველი ლიგის წარმომადგენელ “არაზ-ნახჩევანს” ვერ გაცდა. ამ გუნდების დაპირისპირების ძირითადი და დამატებითი დრო 2:2 დასრულდა. პენალტები უფრო ზუსტად “არაზ-ნახჩევანმა” დაარტყა 4:2. აღსანიშნავია, რომ 45-ე წუთზე “არაზში” მოთამაშე დავით ჯანელიძემ ანგარიში პენალტით გაათანაბრა.