აზერბაიჯანის საფეხბურთო პრემიერლიგის 33-ე ტურში, ბაქოს “ინტერმა”, რომელსაც კახა ცხადაძე წვრთნის, შინ “სუმგაითს” 2:0 მოუგო და მასპინძელთა წარმატებას სათავე ალექსანდრე იაშვილმა დაუდო.

ქართველი შემტევი სასტარტო შემადგენლობაში იყო და ანგარიში 51-ე წუთზე გახსნა, ხოლო 63-ე წუთზე შეცვალეს. მიმდინარე სეზონში, 36 წლის იაშვილმა “ინტერში” 30 მატჩი ჩაატარა და 5 გოლი გაიტანა. მან თავი ორჯერ აზერბაიჯანის თასზე გამოიჩინა. ბაჩანა ცხადაძეც სასტარტოში იმყოფებოდა და მოედანი 85-ე წუთზე დატოვა. გიორგი ლომაია სათადარიგოთა სკამზე იჯდა, ხოლო ლაშა სალუქვაძე 18-კაციან განაცხადში არ ფიგურირებდა. “ინტერი” 63 ქულით 10 გუნდში მე-2 ადგილზე იმყოფება.

აგდამის “ყარაბაღმა” სტუმრად “ბაქისთან” ქულები გაიყო – 0:0. ნიკოლოზ გელაშვილი “ყარაბაღის” რიგებში შეცვლაზე 68-ე წუთზე შევიდა. ჯაბა დვალი სამატჩო განაცხადში კი იყო, მაგრამ თამაში არ მოუწია. აგდამელები ჩემპიონატს 63 ქულით ლიდერობენ.

ზაქათალის “სიმურგმა”, რომლის მთავარი მწვრთნელი გიორგი ჩიხრაძეა, შინ ბაქოს აზალ-ს ვერ მოუგო – 0:0. ლაშა კასრაძე სტუმართა 18-კაციან განაცხადში არ იყო. “სიმურგი” 44 ქულით მეექვსეა, ხოლო აზალ-ი 30 ქულით – მერვე.

უკრაინის პრემიერლიგის 28-ე ტურში, ლუგანსკის “ზორიამ” სტუმრად “სევასტოპოლი” 2:0 დაამარცხა. ჯაბა ლიპარტია ლუგანსკელთა სამატჩო განაცხადში არ ფიგურირებდა, ისევე როგორც მათე ღვინიანიძე და დავით დარციმელია სევასტოპოლელთა 18 კაცში ვერ მოხვდნენ. “ზორიას” 42 ქულით 16 გუნდში მე-6 პოზიცია უკავია. “სევასტოპოლი” 29 ქულით მეათეა.

ყაზახეთის პრემიერლიგის მე-9 ტურში “ატირაუმ” თავის მოედანზე “ორდაბასის” ვერ მოუგო – 1:1. გიორგი ფეიქრიშვილი მასპინძელთა 18-კაციან განაცხადში კვლავ არ იყო. “ატირაუ” 13 ქულით 12 გუნდში მეხუთეა.

“ჟეტისუმ”, რომელსაც ომარ თეთრაძე წვრთნის, გასვლაზე “ტარაზთან” 0:1 წააგო. “ჟეტისუ” 12 ქულით მეექვსეა.

სომხეთის პრემიერლიგის 28-ე ტურში, ერევნის “ბანანცმა” სახლში “ალაშკერტს” 2:0 აჯობა. უჩა გოგოლაძე გამარჯვებულთა სასტარტოში არ იყო და თამაშში 59-ე წუთიდან ჩაერთო. “ბანანცს” 44 ქულა აქვს და სომხეთის 8-გუნდიან ჩემპიონატს ლიდერობს.

“განძასარმა” გასვლაზე “ულისესთან” 0:1 წააგო და შოთა ჯიქია სტუმართა სამატჩო განაცხადში არ იყო. “განძასარი” 29 ქულით მეექვსეა.