თელ ავივის “მაკაბიმ” ისრაელის ჩემპიონატის ფინალში თამაშის უფლება მოიპოვა, რაშიც რიკი ჰიკმანის წვლილი უდიდესია. ეილატის “ჰაპოელთან” მორიგ შეხვედრაში საქართველოს ნაკრების კალათბურთელი ორივე გუნდის რიგებში ერთ-ერთი ყველაზე შედეგიანი გახლდათ, “მაკაბიმ” კი ნახევარფინალური სერია 3:1 მოიგო.

გასული მატჩი წინა შეხვედრებზე დრამატული გამოდგა და მისი ბედი ოვერტაიმში გადაწყდა. მიუხედავად იმისა, რომ პირველ ტაიმში ეილატელები 10 ქულაზე მეტს იგებდნენ, ევროლიგის მოქმედმა ჩემპიონმა მდგომარეობის გამოსწორება მოახერხა და საბოლოოდ, 100:96 იმარჯვა.

როგორც აღვნიშნეთ, გამარჯვებაში ჰიკმანის წვლილი უდიდესია. რიკი სტუმართა სასტარტო ხუთეულში იყო და 32 წუთში 21 ქულა, 4 მოხსნა, 1 ჩაჭრა და 1 პასი მოაგროვა.

ქართული პასპორტის მქონე ამერიკელმა 7-დან 3 ორქულიანი, 3-დან 1 სამქულიანი და 14-დან 12 საჯარიმო ჩააგდო. ჰიკმანმა ბურთი 4-ჯერ დაკარგა, ერთხელ დაუფარეს, 3 პერსონალური ფოლი მიიღო, მის წინააღმდეგ კი ერთბაშად 10-ჯერ (!) დაჯარიმდნენ.

“მაკაბის” მხრიდან კარგად ითამაშეს სოფოკლის შორცანიტისმა (22 ქულა), ტაირის რაისმა (16 ქულა, 7 პასი) და დუეინ სმიტმა (15 ქულა, 9 მოხსნა, 5 პასი), ხოლო “ჰაპოელს” ამერიკელმა კრისტიან უოტფორდმა ულიდერა 19 ქულით.

ფინალში თელ ავიველთა მეტოქე ჰაიფას “მაკაბი” იქნება, რომელმაც იერუსალიმის “ჰაპოელი” ასევე 3:1 დაამარცხა.