გერმანული ბუნდესლიგის გასული ტურის მატჩში “დორტმუნდმა” საკუთარ “სიგნალ იდუნა პარკზე” “მაინცს” 4:2 მოუგო და ოფიციალურად დაიბევა ჩემპიონთა ლიგის მომავალი გათამაშების ჯგუფურ ეტაპზე თამაშის უფლება. “ბილდის” კორესპონდენტი დორტმუნდელთა კლუბის სპორტულ დირექტორს ჰანს-იოაჰიმ ვაცკეს შეხვდა და რამდენიმე კითხვაზე პასუხის გაცემა სთხოვა. 

- ჰერ ვაცკე, სეზონის წინ დორტმუნდელ გულშემატკივრებს დაჰპირდით, რომ წლეულს ბუნდესლიგის დასრულების შემდეგ მიუნხენის “ბაიერნთან” 25 ქულიანი ჩამორჩენა არ გექნებოდათ. ფინიშამდე 3 ტურით ადრე ბავარიელებს “მხოლოდ” 17 ქულით ჩამორჩებით...

- სიტყვა შევასრულე (იცინის). თუკი სერიოზულად ვიტყვით, “ბაიერნი” წელსაც ფანტასტიკურ სეზონს ატარებს. მიუნხენური კლუბი გერმანული საკლუბო ფეხბურთის ფლაგმანია. მომავალ სეზონში ბაიერნელებთან ქულათა სხვაობის კიდევ უფრო შემცირებას შევეცდებით, თუმცა, თუ მათ სამომავლოდაც ასეთ დონეზე იასპარეზეს, ამის გაკეთება გაგვიჭირდება.

- გელზენკირხენის “შალკეს” ჩემპიონთა ლიგაში პირდაპირ მოხვედრის რეალური შანსი აქვს. ღოგორ უყურებთ პრინციპული მეტოქის ამ პერსპექტივას? 

- თუკი “შალკე” ჩემპიონთა ლიგის საგზურს მოიპოვებს, ეს სავსებით დამსახურებული იქნება. რურისთვის კი ეს მშვენიერი ამბავია – რეგიონი საფეხბურთო ასპექტით კიდევ უფრო განვითარდება.

- მომავალ ზაფხულს რობერტ ლევანდოვსკი “ბაიერნში” გადავა. როგორ აპირებთ ამ დანაკლისის კომპენსირებას?

- როდესაც ნური შაჰინი მადრიდში გადაბარგდა, ყველა ამბობდა, რომ მის სრულფასოვნად შეცვლას ვერ მოვახერხებდით. იგივე საუბარი იყო კაგავას “მანჩესტერ იუნაიტედში” წასვლის შემდეგაც. ცხადია, ლევანდოვსკის ასლს ვერ მოვიყვანთ, მაგრამ მისი წასვლით “დორტმუნდი” კრიზისში ნამდვილად არ ჩავარდება.

- დარწმუნებული ხართ, რომ პოლონელი ფორვარდის გამოკლება დიდად არ დაგაზარალებთ?

- იურგენ კლოპის სახით ჩვენ პლანეტის საუკეთესო მწვრთნელი გვყავს, რომელიც ყოველთვის პოულობს სთანადო გადაწყვეტილებას. მომავალი სეზონის წინ არ ვინერვიულებ და მშვიდად ვიქნები. დარწმუნებული ვარ, სამომავლოდაც წარმატებით გამოვალთ.

- მალე ტრავმირებული ილკაი გუნდოგანი დაგიბრუნდებათ...

- კარგია, მასთან კონტრაქტი რომ გავახანგრძლივეთ. ეჭვიც არ მეპარება, გუნდოგანი ძველებურ დონეზე ათამაშდება.