ქართველმა სუმოისტმა თეიმურაზ ჯუღელმა იგივე გაგამარუმ ნაცუ ბაშოზე მე-5 მარცხი განიცადა და უარყოფით ბალანსს კიდევ უფრო მიუახლოვდა. შეგახსენებთ, რომ ქართველი გოლიათი მაისის სუპერტურნირზე აღმოსავლეთის მე-14 მაეგაშირას წოდებით ირჯება, ამდენად, მორიგი მაკე-კოშის შემთხვევაში, დიდი ალბათობით, რანგით მე-2 ძურიოს დივიზიონში აღმოჩნდება.

გაგამარუ ამჯერად დასავლეთის მე-11 მაეგაშირა ჩიიომარუს დაუპირისპირდა და უვატენაგეთი დამარცხდა. ჯუღელმა იაპონელის პირველი შეტევა მოიგერია და მაკიკაეც (მარცხენა ხელი მოწინააღმდეგის მარჯვენა ხელის ქვეშ გადაიტანა) განახორციელა, თუმცა, კონტრ-ილეთს ვეღარ გადაურჩა.

ქართველ სეკიტორს დადებითი ბალანსის დასაფიქსირებლად დარჩენილი 7 ორთაბრძოლიდან ხუთის მოგება სჭირდება, რაც ურთულესი საქმე იქნება. თეიმურაზის მომდევნო მეტოქე ძურიოს პირველი ნომერი აძუმარიუ იქნება.

ელიტარულ მაკუუჩი დივიზიონში ერთპიროვნულ ლიდერად ისევ მონღოლი იოკოძუნა ჰაკუჰო რჩება, რომელმაც მიჯრით მე-8 მოგება კომუსუბი იოშიკაძესთან მიითვალა. “თეთრ ფენიქსს” თითო გამარჯვებით ოძეკი კისენოსატო და მე-5 მაეგაშირა იკიოი ჩამორჩებიან.

რანგით მე-3 დივიზიონ მაკუშიტაში მორიგ ორთაბრძოლას 19 მაისს ჩაატარებს ტოჩინოშინის შიკონათი ცნობილი ლევან გორგაძე, რომელსაც გასული ოთხივე ორთაბრძოლა მოგებული აქვს. დასავლეთის მე-6 ნომრად მიჩნეული ქართველი სუმოისტი ორშაბათს დასავლეთის მე-11 რეიტინგის მქონე დევაჰაიატეს გაეჯიბრება.

 ნაცუ ბაშოს მე-8 დღის მიმოხილვა

http://www.youtube.com/watch?v=n-8JnPyKXm0