ქართველი ჩოგბურთელი ეკატერინე გორგოძე საფრანგეთის ქალაქ სენტ გოდენში მიმდინარე საერთაშორისო ტურნირის (საპრიზო ფონდი 50 ათასი დოლარი) ძირითად ბადეში კი გავიდა, თუმცა, მეტ წარმატებას ვერ მიაღწია.

კვალიფიკაციაში 3 მეტოქის დაჯაბვნის კვალად, გორგოძე ლიხტენშტეინელ შტეფანი ვოგტს დაუპირისპირდა და 5:7, 3:6 წააგო. წყვილებში გორგოძე და ჩილელი სესილია კოსტა მელგარი მე-4 ნომრად განთესილ სოფო შაფათავას და უკრაინელ ანასტასია ვასილიევას გაეჯიბრებიან.

ანა ახალკაცმა ანტალიის 10-ათასიანი ტურნირის კვალიფიკაციაში რუს ანა კლებლეევას 6:4, 6:1 სძლია, ძირითად ბადეში კი მე-8 ნომრად განთესილ ფრანგ ოსეან დოდინთან 1:6, 1:6 დამარცხდა.

წყვილებში ახალკაცმა და რუსმა ვასილისა აპონასენკომ თურქებს – დაგილმისგულს და კოკჩეს 6:1, 6:2 მოუგეს და მეოთხედფინალში მე-2 ნომრად მიჩნეულ სერბულ-მექსიკურ დუეტს (ბონიჩი-ერმოსო) გაეჯიბრებიან.

შარმ ელ შეიხის 10-ათასიან ტურნირზე მე-6 რეიტინგის მქონე თამარ ჭალაგანიძე ჩერნოგორიელ ტამარა ბოიანიჩს გაეჯიბრა და 1:6, 2:6 წააგო. წყვილთა შეჯიბრში ჭალაგანიძე და ყაზახი ეკატერინა გუბანოვა არგენტინელი აგუირის და რუსი გორდიენკოს პირისპირ დადგებიან.