ანტალიის 10-ათასიანი ტურნირის საწყის რაუნდში მე-7 ნომრად განთესილმა ეკატერინე გორგოძემ პოლონელი ბარბარა სობასკიევიჩი 6:1, 7:6 (7:2) დაამარცხა და მერვედფინალში გააღწია, სადაც ყაზახ ასია დაირს ეთამაშება. ამ უკანასკნელმა რუსეთის სახელით მოთამაშე ეკატერინა წიკლაურს 6:0, 6:3 მოუგო.

პირველ წრეში პირველ ნომრად მიჩნეულ რუმინელ ანა ბოგდანს დაუპირისპირდება სოფო ქვაცაბაია. წყვილებში ქვაცაბაიამ და თურქმა ესენ კოკჩემ მე-3 რეიტინგის მქონე ავსტრიულ-პოლონურ დუეტთან (კონიგი-სობასკიევიჩი) 4:6, 3:6 წააგეს, გორგოძე და მოლდოველი ანასტასია ვდოვენკო კი ჰოლანდიელ ტედია აბდის და ხსენებულ წიკლაურს გაეჯიბრებიან.

აშშ-ში, როკ ჰილის 25-ათასიან ტურნირში მე-6 განთესვით ჩაებმება ანა ტატიშვილი. საქართველოს პირველი ჩოგანი საწყის წრეში “უაილდ ქარდით” მიწვეულ ამერიკელ ალექსანდრა მუელერთან მოსინჯავს ძალებს.

შეგახსენებთ, რომ კვალიფიკაციის დაძლევის შემდეგ, შიმკენტის 10-ათასიან ტურნირში თამაშის უფლება მოპიოვა ალექსანდრე მეტრეველმა. ქართველი ჩოგბურთელის მომდევნო მოწინააღმდეგე რუსი ანდრეი პლოტნი იქნება.