პოლონურ ექსტრაკლასაში დუბლი მიითვალა ლადო დვალიშვილმა, რომლის "ლეგიამ" შინ 4:1 მოუგო "პიასტს" და ორქულიანი ჰანდიკაპით ლიდერობს. ქართველმა ფორვარდმა შეუცვლელად ითამაშა, 32-ე წუთზე ანგარიში გახსნა, ხოლო 63-ე წუთზე 3:1 გახადა ანგარიში.

დვალიშვილს მიმდინარე სეზონში 9 მატჩში 7 გოლი დაუგროვდა და მხოლოდ "შლიონსკის" ფორვარდ პაიშაოს (9 გოლი) ჩამორჩება. შეხსენებისთვის, ლადოს ესპანეთ-საქართველოს მატჩში არ უთამაშია – სათადარიგო გახლდათ.

"დვალიშვილმა კრიტიკოსებს კიდევ ერთხელ დაუმტკიცა, რომ დროს ამაოდ კარგავენ. ის დღესაც საუკეთესო იყო იან ურბანის გუნდში" – წერს Ekstraklassa.   

პორტუგალიის თასის II რაუნდში გოლი გაიტანა "ჟილ ვისენტეს" 22 წლის ქართველმა შემტევმა ავთო ებრალიძემ. ის "კალდასთან" შეხვედრის მე-60 წუთზე შევიდა მინდორზე, ხოლო გოლი 77-ე წუთზე მიითვალა სოლო-გარღვევის შემდეგ. "ჟილ ვისენტემ" 5:0 მოიგო. ცნობისთვის, ეს ავთოს პირველი გოლია "ჟილ ვისენტეში".

გერმანიის II ბუნდესლიგაში ლევან ყენიას "ფორტუნამ" გასვლაზე 2:1 აჯობა "ინგოლშტადტს", თუმცა ქართველი ნახევარმცველი მცირე ტრავმის გამო, განაცხადში არ ყოფილა. "ფორტუნა" მეხუთე საფეხურზეა.

ლატვიის ჩემპიონატში თორნიკე თარხნიშვილის "ვენტსპილსი" გალიდერდა, რომელმაც შინ 6:1 სძლია "იურმალას". თარხნიშვილი 65-ე წუთძე შევიდა მინდორზე. "ვენტსპილსი" 2 ქულით უსწრებს თამაზ პერტიას გაწვრთნილ "სკონტოს", ჩემპიონატის დასრულებამდე კი 3 ტური დარჩა.

ხორვატიის ჩემპიონატში "ჰაიდუკმა" გასვლაზე 2:1 მოიგო "ჰრვატსკი დრაგოვოლიაცთან" და ლიდერია – სპლიტელთა დარად, 27 ქულაა აქვს ზაგრების "დინამოსაც", თუმცა ბურთების სხვაობით ჩამორჩება. გიორგი ილურიძე სასტარტოში გახლდათ და 55-ე წუთზე შეცვალა ბენცუნმა, რომელმაც ორი გოლი გაიტანა, მათ შორის, ერთი ზედ საფინალო სასტვენის წინ.

კვიპროსის ჩემპიონატში კი შოთა გრიგალაშვილმა გაიტანა. "ანორთოსისი" შინ აგებდა "აშნასთან" და 2:1 იმარჯვა, ქართველმა ნახევარმცველმა 39-ე წუთზე გაათანაბრა ანგარიში: ორიგინალურად გააჩერა ბურთი და ცაციით ეფექტურად თავზე გადაუგდო მეკარეს. ეს გრიგალაშვილის პირველი გოლია კვიპროსული კლუბის მაისურით. შოთამ 77-ე წუთამდე ითამაშა. აქვე ვთქვათ, რომ "ანორთოსისი" პირველ ადგილზეა ჩემპიონატში.