საქართველოს ძიუდოისტთა ნაკრების წევრები ზვიად გოგოჭური (90 კგ) და ლევან მატიაშვილი (+100 კგ) მოსკოვის “დიდ სლემზე” ბრინჯაოს მედლებისთვის იჭიდავებენ.

გოგოჭური შეჯიბრებაში პირდაპირ მერვედფინალიდან ჩაერთო და ბრაზილიელ ედუარდო სილვას გაფრთხილებით მოუგო. რუს იური პანასენკოვთან კი სუფთად დამარცხდა და რეპეშაჟის ნახევარფინალში გადაერთო, სადაც მეტოქე – ჰოლანდიელი ჯილომ ელმონი ტრავმის გამო არ გამოუცხადდა. “ბრინჯაოს ფინალში” ქართველი ძიუდოისტი იაპონელ ჰიროკატა კატოს დაუპირისპირდება.

ლევან მატიაშვილმა ოქრო-ვერცხლის შანსი ნახევარფინალში დაკარგა, გერმანელ რობერტ ციმერმანთან წაგების გამო. ამ შეხვედრამდე ორი ეტაპი გაიარა - აზერბაიჯანის სახელით მოჭიდავე ვახტანგ ბიტიევსა და რუს ანდრეი ვოლკოვს თითო იუკოს უპირატესობით აჯობა. რეპეშაჟის ფინალში კი ყირგიზ იური კრაკოვეცკის შეხვდება.

დღეს რუსულ ტატამზე ვარლამ ლიპარტელიანი, ნოდარ მეტრეველი (ორივე 100 კგ) და ადამ ოქრუაშვილიც (+100 კგ) გავიდნენ, მაგრამ სამივე წინასწარ ეტაპზევე დამარცხდა.