საქართველოს ძიუდოისტთა ნაკრები თბილისის გრან პრის დასკვნით დღეს 2 ოქროსა და 5 ბრინჯაოს მედლისთვის იბრძვის.

ჩემპიონის ტიტულს თითო გამარჯვება აშორებთ 90 კილოგრამ წონით კატეგორიაში მოჭიდავე ზვიად გოგოჭურს და მძიმეწონოსან ადამ ოქრუაშვილს. მესამე საპრიზო ადგილისთვის კი პაატა ღვინიაშვილი (90 კგ), გურამ თუშიშვილი, დავით ლორიაშვილი (ორივე 100 კგ), ლევან მატიაშვილი (+100 კგ) და ელენე ქებაძე (+78 კგ) იჭიდავებენ.

გოგოჭური ფინალში იტალიელ ვალტერ ფაცენტეს დაუპირისპირდება, ოქრუაშვილი ახალგაზრდებს შორის ევროპის და მსოფლიოს მოქმედ ჩემპიონს, რუს ანტონ კრივობოკოვს შეხვდება. ღვინიაშვილი – რუს კირილ დენისოვს, თუშიშვილი – ირანელ ჯავად მაჰჯოუბს, ლორიაშვილი – აზერბაიჯანელ ელმარ გასიმოვს, მატიაშვილი – რუმინელ დანიელ ნატეას, ხოლო ქებაძე – რუს ქსენია ჩიბისოვას.

დღეს ჩემპიონ-პრიზიორები კაცებში 90, 100 და +100 კილოგრამ წონით კატეგორიებში უნდა გამოვლინდნენ, ქალებში – 78 და +78 კილოგრამებში. საქართველოს სახელით სატურნირო ბადეებში 15 ძიუდოისტი იყო გადანაწილებული. ფინალურ ბლოკამდე მისული 7 სპორტსმენის გარდა, საქართველოს გუნდური ჩათვლის ქულები ალექსანდრე მსხალაძემ (100 კგ), როსტომ ხახალეიშვილმა (+100 კგ), ნინო ოძელაშვილმა (78 კგ) და ირინე ლეონიძემ (+78 კგ) აიღეს. ოთხივემ მე-7 ადგილი დაიკავა.

ტატამზე საერთოდ არ გასულა 90 კილოგრამში პირველ ნომრად განთესილი ვარლამ ლიპარტელიანი, რომელმაც წინასატურნირო ბოლო ვარჯიშზე ტრავმა მიიღო. ბექა ღვინიაშვილმა (90 კგ), რევაზ ჩიკოიძემ (100 კგ), ონისე ბუღაძემ (+100 კგ) და ნინო ოძელაშვილმა (78 კგ) კი წინასწარ ეტაპზევე წააგეს და შესაბამისად, სამივე სინჯის მედლისთვის ბრძოლის შანსი უმალ დაკარგეს.

ფინალური ბლოკის შეხვედრები 17 საათიდან დაიწყება.