საქართველოს ჭაბუკ ძიუდოისტთა ნაკრებმა 24-26 ივნისს, მალტის ქალაქ კოტონერაში ჩატარებულ მსოფლიოს ჩემპიონატზე 2 ოქროს, 2 ვერცხლისა და 3 ბრინჯაოს მედალი მოიპოვა. ასე შედეგიანად ქართული ჭაბუკთა გუნდი ევროპირველობაზე 11 წელია არ გამოსულა. წინ მსოფლიოს ჩემპიონატია, რომელსაც 11-14 აგვისტოს უკრაინის დედაქალაქი კიევი უმასპინძლებს. ევროპირველობის შესაჯამებლად და მსოფლიოს სამზადისზე სასაუბროდ “მსოფლიო სპორტი” ნაკრების მთავარ მწვრთნელ გიორგი ვაზაგაშვილს შეხვდა.
- საერთო შედეგიანობით, რა თქმა უნდა, კმაყოფილი ვარ, მაგრამ გაცილებით მეტიც შეგვეძლო. გუნდურ პირველ ადგილსაც აუცილებლად დავიკავებდით, რომ არა საეჭვო კონკურენცია.
- რას გულისხმობთ?
- ჩვენი ბიჭები რამდენიმეჯერ ისეთ მეტოქეებთან დამარცხდნენ, რომლებსაც ჭაბუკებს ვერაფრით ვერ დავარქმევ. მაინც სასიხარულოა, რომ თავისზე ბევრით უფროსებთან ასეთ დონეზე იჭიდავეს.
- რომელი ძიუდოისტები დაზარალდნენ?
- 73 კილოგრამში მოჭიდავე ლევან გუგავა და ბექა დონღვანი ფინალს მიღმა დარჩნენ. თამაზ კირაკოზაშვილი (60 კგ) და გიორგი ლაზუაშვილი (+90 კგ) კი ფინალში დაიჩაგრნენ. ოთხივე რუს მეტოქესთან დამარცხდა.
- მსოფლიოს ჩემპიონატამდე თვენახევარიღა რჩება. სამზადისს როდიდან დაიწყებთ?
- გეგმაში ორი შეკრება გვაქვს, მაგრამ ჯერ არ დაზუსტებულა, სად მოვემზადებით. კონკრეტულ გადაწყვეტილებას უახლოეს დღეებში, ფედერაციის ხელმძღვანელობასთან ერთად მივიღებთ.
- ტურნირზეც ხომ არ იჭიდავებთ?
- 24-26 ივლისს, ტრაბზონში, ბავშვთა ოლიმპიურ თამაშებში მივიღებთ მონაწილეობას. მაგრამ ჯერ არ ვიცით, მსოფლიოს ჩემპიონატზე დასაყენებელ შემადგენლობას წავიყვანთ თურქეთში თუ ნაკრების კანდიდატებს. დროის მცირე მონაკვეთში სამი ასეთი რანგის შეჯიბრების ჭიდაობა წარმოუდგენლად ძნელია.
ოთარ მაღლაკელიძე
