იაპონიის დედაქალაქ ტოკიოში მიმდინარე მაისის სუპერტურნირზე 10 საშეჯიბრო დღე მიილია. ელიტარული მაკუუჩი დივიზიონის ერთადერთმა ქართველმა ბინადარმა თეიმურაზ ჯუღელმა იგივე გაგამარუმ მე-5 გამარჯვება იზეიმა და ისევ თანაბარ ბალანსზე (კაჩი-კოში) გავიდა.
აღმოსავლეთის მე-14 მაეგაშირას წოდებით მოასპარეზე გაგამარუ ამჯერად დასავლეთის მე-14 მაეგაშირა ტოკიტენკუს გაეჯიბრა და ოშიდაშით იმარჯვა. ქართველმა გოლიათმა მეტოქეს მარჯვენა ხელი ყელში წაავლო (ნოდოვა) და “დროის ციური კაბადონი” ტავარას მიღმა იოლად გაიყვანა.
გაგამარუს მომდევნო ბრძოლა აღმოსავლეთის მე-8 მაეგაშირა მიოგირიუსთან
ნაცუ ბაშოზე მე-6 შეხვედრა 21 მაისს ელის ტოჩინოშინის შიკონათი ცნობილ ლევან გორგაძეს, რომელსაც ზურგს 5 მოგება უმაგრებს და რანგით მე-3 მაკუშიტას დივიზიონის ლიდერთა შორის იმყოფება. ოთხშაბათს, ტოჩინოშინი მისსავით დაუმარცხებელ კავანარის დაუპირისპირდება, რომელსაც დასავლეთის მე-20 რეიტინგი აქვს მიკუთვნებული, თავად გორგაძე კი დასავლეთის მე-6 ნომერია.
უცვლელი რჩება მდგომარეობა უმაღლესი მაკუუჩი დივიზიონის ლიდერთა შორის. იოკოძუნა ჰაკუჰომ მიჯრით მე-10 გამარჯვება სეკივაკე ტოჩიოძანთან მიითვალა, ოძეკი კისენოსატოს და დასავლეთის მე-5 მაეგაშირა იკოის აქტივში 9-9 გამარჯვება აქვთ, იოკოძუნებმა – ჰარუმაფუჯიმ და კაკურიუმ კი, შესაბამისად, 8 და 7 მოგება მოაგროვეს.
ნაცუ ბაშოს მე-10 დღის მიმოხილვა
