18 წლამდელთა შორის კალათბურთში საქართველოს ჩემპიონს რუსთავში 27 მაისს ადგილობრივ გუნდსა და „ჰიუნდაის“ შორის ჩასატარებელი შეხვედრა გამოავლენს. ქვემოქართლელებმა შინ ფინალური სერიის პირველი მატჩი დათმეს, მაგრამ დღეს თბილისის სპორტის სასახლეში 63:52 ანგარიშით რევანში აიღეს და ჩემპიონის გამოსავლენად მესამე ასპარეზობის დანიშვნა გახდა საჭირო.

დღევანდელ შეხვედრაში გამარჯვებულთაგან თორნიკე ქიტოშვილი (20 ქულა, 5 მოხსნა), გიორგი დვალი (16 ქულა, 3 მოხსნა), შოთ ნარჩომაშვილი (7 ქულა, 20 მოხსნა) და ლევან ურიდია (2 ქულა, 15 მოხსნა) გამოირჩნენ. „ჰიუნდაის“ რაც შეეხება, მის რიგებში საუკეთესონი რუსლან მამფორია (8 ქულა, 15 მოხსნა), ალექსანდრე ბოლქვაძე (14 ქულა, 9 მოხსნა) და და ლუკა ზაქრაძე (12 ქულა, 8 მოხსნა) იყვნენ.

მატჩისშემდგომი პრესკონფერენცია

 ირაკლი მებურიშვილი („რუსთავის“ მთავარი მწვრთნელი): „გუშინ დაძაბული მატჩი წავაგეთ. სათანადო ანალიზი გავაკეთეთ და დღეს უკეთ ვითამაშეთ. სწრაფი თამაში გამოგვივიდა. მეტოქემ ასპარეზობის ბედი თითქოს მოაბრუნა, მაგრამ საბოლოოდ მაინც ვიმარჯვეთ“.

ნიკოლოზ ჩერქეზიშვილი („ჰიუნდაის“ მთავარი მწვრთნელი): „მოწინააღმდეგემ პრაქტიკულად ყველა ასპექტში გვაჯობა“.

თორნიკე ხატიაშვილი („რუსთავი“): „გუშინ შინ დავმარცხდით, შეცდომები გავითვალისწინეთ და დღეს მოვიგეთ. შევეცდებით ხვალაც ვიმარჯვოთ“.

ნიკოლოზ ლომიძე („ჰიუნდაი“): „პირველი თამში ჩვენ გამოგვივიდა, დღევანდელი – მეტოქეს, ხვალ მოსაგებად გავალთ“.