საქართველოს მშვილდოსანთა ნაკრებმა ხათუნა ნარიმანიძის, ქრისტინე ესებუასა და ასმათ დიასამიძის შემადგენლობით, ესპანეთის ქალაქ კამბრილსში მიმდინარე ზამთრის ევროპის ჩემპიონატზე, ფინალში ასპარეზობის უფლება მოიპოვა. ინდივიდუალური შედეგებიდან გამომდინარე, საქართველოს ნაკრები მეოთხედფინალში მე-4 შედეგით შევიდა და ორი გამარჯვების მოპოვება მოახერხა. ქართველებმა მე-5 განთესვის მქონე პოლონეთს 227:219 სძლიეს, შემდეგ კი პირველ ნომრად განთესილ რუსებთან ნამდვილი ტრილერი გადაიტანეს. ქართულ-რუსული შერკინების ძირითადი ეტაპი ფრედ, 226:226 დასრულდა, ყაიმი აღინიშნა პირველ დამატებით რაუნდშიც – 29:29, მე-2 დამატებითში კი ქართულმა ტრიომ 29:25 იმარჯვა.
ქართველებმა ფავორიტი რუსები გზიდან კი ჩამოიცილეს, თუმცა, ფინალშიც არანაკლებ რთული ბრძოლა ელით. საქართველოს ნაკრების პირისპირ მე-3 რეიტინგის  უკრაინის ნაკრები დადგება, რომელიც მეოთხედფინალში თავისუფალი გახლდათ, ნახევარფინალში კი იტალიის ძლიერი ნაკრები (მე-2 განთესვა) 225:223 დაამარცხა. ფინალი ხვალისთვისაა დაგეგმილი, მე-3 ადგილისთვის მატჩი კი დღესვე შედგა და რუსებმა იტალიელებს დამატებით რაუნდში 30:28 მოუგეს (ძირითადი 231:231 დასრულდა).
დასასრულს მიუახლოვდა ასპარეზობა ქალთა ინდივიდუალურ ჩემპიონატშიც, თუმცა, ამ შემთხვევაში, ქართველები არცთუ წარმატებულად გამოვიდნენ. შესარჩევ რაუნდში ხათუნა ნარიმანიძემ მე-5 შედეგი (289 ქულა) აჩვენა, ქრისტინე ესებუა და ასმათ დიასამიძე კი ერთნაირი მაჩვენებლით (284) მეთვრამეტე-მეცხრამეტე ადგილებზე აღმოჩნდნენ.
უკვე ძირითად ეტაპზე, ყველაზე უკეთ ნარიმანიძემ იასპარეზა, რომელმაც პირველ რაუნდში დაისვენა, შემდეგ კი დანიელ ლუის ლაურსენს – 6:0 მოუგო, თუმცა მეოთხედფინალში ჰოლანდიელ კობი ჰურკმანსთან 4:6 დამარცხდა. ესებუამ აპენინელ ელენა ტონეტას ძლევის (6:2) შემდეგ, იტალიისვე სახელით მოასპარეზე ექს-მოლდოველ, მსოფლიოს ორგზის ჩემპიონ ნატალია ვალეევასთან წაიფორხილა (0:6), დიასამიძე კი პოლონელ ნატალია ლესნიაკს ვერ გაუმკლავდა – 2:6. ცნობისთვის, ნარიმანიძის მძლეველმა ჰურკმანსმა საბოლოოდ ბრინჯაოს მედალი მოიპოვა, ვალეევა კი ფინალში რუს ტატიანა ბოროდეის შეერკინება.