საქართველოს ფეხბურთის ფედერაციის პრეზიდენტმა დომენტი სიჭინავამ და გენერალურმა მდივანმა რეზო არველაძემ შაბათს საქართველოს პრემიერმინისტრს ირაკლი ღარიბაშვილს ფეხბურთის განვითარების სამწლიანი პროექტი წარუდგინეს. ხსენებული პროექტის დეტალურად გაცნობის მსურველს მისი ნახვა ფეხბურთის ფედერაციის ოფიციალურ ვებგვერდზე შეუძლია. პროექტი 3-წლიანია (2014-2017) და საერთო ჯამში სახელმწიფოს მხრიდან 99 მილიონი ლარის დახარჯვას ითვალისწინებს – წელიწადში 33 მილიონი ლარი. სეზონის განმავლობაში უმაღლესი ლიგის 12 გუნდიდან ყოველი მაქსიმუმ 1,5 მილიონ ლარს მიიღებს, ხოლო პირველი ლიგის გუნდებიდან თითოეული – 400000 ლარს. აქვე გეტყვით, რომ პროექტი 18-გუნდიან პირველ ლიგას ითვალისწინებს. საქართველოს ჩემპიონატის, პირველი ლიგისა და დავით ყიფიანის სახელობის საქართველოს თასის საპრიზო ფონდი 7,8 მილიონი ლარი იქნება. 

ფედერაციის ხელმძღვანელები ორშაბათს ინფრასტრუქტურისა და რეგიონალური განვითარების მინისტრს დავით ნარმანიას შეხვდნენ, ხოლო სამშაბათს პრესკონფერენცია ჩაატარეს.

სიჭინავამ პროექტის იმ დეტალებზე ისაუბრა, რომელიც ღარიბაშვილს გააცნეს. კერძოდ, საუბარია სახელმწიფოს მხრიდან კლუბების ფინანსურ მხარდაჭერასა და  საფეხბურთო ინფრასტრუქტურის მოწესრიგებაზე (წელიწადში 3 სტადიონის რეაბილიტაცია). 2015 წლის უეფას ევროპის სუპერთასისთვის გასაწევ სამუშაოებზე. უკვე გადაწყვეტილია, რომ ხსენებული მატჩი “დინამო არენაზე” ჩატარდება. საქართველოს 2017 წელს 19 წლამდე ფეხბურთელთა ევროპის ჩემპიონატის მასპინძლობა სურს. ფედერაციის ჩანაფიქრით თამაშები “დინამო არენაზე”, “მიხეილ მესხზე”, რუსთავის “ფოლადზე” და გორის “თენგიზ ბურჯანაძეზე” უნდა გაიმართოს. ამასთანავე, მზად უნდა იყოს “მცხეთა პარკისა” და ტექნიკურ ცენტრ “ბასას” მოედნები.

ფედერაცის პროექტის მიხედვით, უეფასთან ერთად და სახელმწიფოს ხელშეწყობით კარგი იქნება თუ საქართველოს სხვადასხვა რეგიონში ფეხბურთის განვითარების სამი ცენტრი ე.წ. საფეხბურთო აკადემიები ჩამოყალიბდება. ასევე, ხსენებული პროექტიდან გამომდინარე, სპორტის სამინისტროსთან და განათლების სამინისტროსთან ერთად ფეხბურთის პოპულარიზაციისთვის სხვადასხვა ღონისძიებების ჩატარება იგეგმება.

ეს პროექტის თუ განხორციელდა, ეროვნული ჩემპიონატის უმაღლეს ლიგაში საპრიზო ფონდი გუნდების მიერ დაგროვებული ქულების მიხედვით გადანაწილდება. უმაღლესი ლიგის გუნდების გარდა, პირველი ლიგის გუნდების დახმარებაცაა გათვალისწინებული, რომ მათ დუბლშემადგენლობები და ჭაბუკთა თითო გუნდი ჰყავდეთ.

სიჭინავამ აღნიშნა, რომ ირაკლი ღარიბაშვილს ქართულ ფეხბურთი არსებულ ვითარებაზე სიმართლე გააგებინეს. ფედერაციის პრეზიდენტმა ხაზი გაუსვა, რომ პრემიერმინისტრი დაინტერესდა პროექტით და კომისიის შექმნა აღუთქვა, რომელსაც თავად უხელმძღვანელებს, რათა არსებული პრობლემები მოგვარდეს. ღარიბაშვილმა ნარმანიას დაავალა, რომ სტადიონების რეაბილიტაციის, სუპერთასის მასპინძლობის, 19-წლამდელთა ევროპის ჩემპიონატის მასპინძლობისა და საფეხბურთო აკადემიების ჩამოყალიბების საკითხები განეხილა.

სიჭინავამ დააფიქსირა, რომ თუ სპორტის მინისტრ ლევან ყიფიანს, რომელიც შაბათის შეხვედრას ესწრებოდა, ფეხბურთის განვითარების საკუთარი პროექტი აქვს, რომელიც ფედერაციისაზე უკეთესია და სახელმწიფო მხარს დაუჭერს, მისთვის პრობლემა არაა.

მან განაცხადა, რომ ხსენებული პროექტის მიხედვით, ქართულ ფეხბურთში მოთამაშეების ჩათვლით 4000 ადამიანი დასაქმდება და კლუბებში როგორც მენეჯმენტის, ასევე მარკეტინგის საკითხები მოგვარდება.

ბუნებრივია, სახელმწიფოს ექნება კონტროლის მექანიზმები, რომ კლუბებისთვის გაცემული თანხა მიზნობრივად დაიხარჯოს. ამ შემთხვევაში ფედერაციას კლუბებისთვის მისაცემ ფულთან შეხება არ ექნება. ისინი სახელმწიფოსგან გამოყოფილ თანხებს ხაზინიდან მიიღებენ.

სიჭინავამ ჟურნალისტებს აუწყა, რომ მათ პროექტს ხელისუფლება უახლოესი კვირეების განმავლობაში განიხილავს და ფედერაციას პასუხს გასცემს.

სიჭინავას თქმით, სახელმწიფოს მიერ გამოყოფილი 7 მილიონი ლარიდან, ფედერაციამ 2400000 ლარი კლუბებს დაუთმო, 220000 ლარის “დიზელით” უზრუნველყო, პირველი ლიგის ყველა გუნდი “სალერის” ეკიპირებით შემოსა და მსგავსი რამ მსოფლიოში არსად ხდება. მაგალითად, თურქეთის ფეხბურთის ფედერაცია მოიყვანა, რომელსაც ბიუჯეტი 200 მილიონი დოლარი აქვს და კიდევ 300 მილიონს მატჩების ტელეტრანსლაციებიდან იღებს.

რაც შეეხება ქეცბაიას ხელფასს, რომელიც უკვე სფფ-ს გასასტუმრებელია, ფედერაციის პრეზიდენტმა განაცხადა, რომ შარშან სახელმწიფოს მიერ მიცემული 7 მილიონი ლარიდან, აპრილში თანხა აღარ ჰქონდათ და ყველა ხარჯს ფედერაცია ფარავდა. მისი ვარაუდით, წელსაც იგივე მოხდება და სფფ-ს, რომელიც მათხოვარი არაა, ბიუჯეტი დაგეგმილი აქვს და ქეცბაიას ხელფასის გასტუმრებასაც შეძლებს. უბრალოდ, ამ შემთხვევაში ფედერაცია ერთ სათამაშო მოედანს ვერ გააკეთებს.