ფორმულა 1-ის გუნდებს შორის ”ფერარი” პირველია, რომელმაც ახალი მანქანა - F10 წარმოადგინა. მარანელოელები იმედოვნებენ, რომ ამ მანქანით, მათი გუნდი ახალ სეზონში კვლავ შეძლებს გამარჯვებებისთვის ბრძოლას.  რამდენად რეალურია მათი იმედები, ამას წინასასეზონო ტესტები და პირველი რბოლები გვიჩვენებს.
”სკუდერიას” ტექნიკური დირექტორი ალდო კოსტა აცხადებს, რომ ბაჰრეინამდე, მანქანა არაერთ მოდიფიკაციას გაივლის და სეზონის სტარტისთვის, ის საკმაოდ განსხვავებული იქნება იმ ვერსიისგან, რომელიც საზოგადოებამ მის პრეზენტაციაზე იხილა:
”ახალი მანქანა ტესტების დროს კიდევ უფრო დაიხვეწება და ნუ გაგიკვირდებათ, თუ მას ბაჰრეინში სრულიად სხვანაირს იხილავთ. დარწმუნებულნი ვართ, რომ უზარმაზარ პროგრესს მივაღწიეთ, თუმცა F10-ის რეალური კონკურენტუნარიანობა მხოლოდ სეზონის პირველ რბოლებში გამოჩნდება”.
ამასობაში, იტალიურ პრესაში გაჩნდა ცნობები იმის თაობაზე, რომ მანქანა არც ისე სწრაფია, როგორც მისი შემქმნელები იმედოვნებდნენ და არაა გამორიცხული, რომ უახლოეს მომავალში, გუნდმა მის ”მოდიფიკაცია B-ზე” მუშაობა დაიწყოს.
და მაინც, მსოფლიოს ორგზის ჩემპიონი, ესპანელი ფერნანდო ალოსნო, ვინც ახალ სეზონში ”ფერარის” მანქანით იასპარეზებს, ოპტიმისტურადაა განწყობილი: ”აბსოლუტურად დამშვიდებული ვარ, რადგან ვიცი, რომ ჩვენს გუნდში მსოფლიოს საუკეთესო ინჟინრები მუშაობენ და გვჯერა, რომ წინ წარმატებული სეზონი გველის”.

მოამზადა მერაბ ლორთქიფანიძემ
http://formula1ge.blogspot.com/