ზაზა ფაჩულიას “მილუოკი ბაქსმა” სეზონში მე-13 გამარჯვება იზეიმა, რაც მძლავრად ჩატარებული ბოლო მეოთხედის ხარჯზე შესძლო. ქართველი ცენტრის ერთ-ერთ ყოფილ კლუბ “ორლანდო მეჯიქთან” შეხვედრის დასკვნითი პერიოდის წინ, მილუოკელები 3 ქულით აგებდნენ, თუმცა, უკანასკნელი 12-წუთეული 37:27 მოიგეს და 105:98 იმარჯვეს.

ფაჩულიამ თამაში სასტარტო ხუთეულში დაიწყო, თუმცა, მოედანზე მხოლოდ 17:11 წუთი გაატარა, რა დროშიც 4 ქულა, 5 მოხსნა (3 მეტოქის ფარზე), 1 ჩაჭრა და 1 დაფარება მიითვალა. საქართველოს ნაკრების კაპიტანმა 5-დან 2 ორქულიანი ჩააგდო, ერთხელ დაუფარეს და 1 პერსონალური ფოლი მიიღო.

“ბაქსის” მხრიდან ყველაზე შედეგიანი ბრენდონ ნაიტი იყო 24 ქულით, თუმცა, ისიც სათქმელია, რომ მან 9 სამქულიანიდან მხოლოდ 1 ჩააგდო. 21 ქულას 7 მოხსნა და 6 პასი წაამატა კრის მიდლტონმა, ხოლო თურქი ერსან ილიასოვა ორმაგ დუბლს გამორჩა – 16 ქულა, 11 მოხსნა.

საინტერსოა, რომ ორლანდოელთაგან 10-ქულიან ზღვარს ერთბაშად 7 კალათბურთელმა უწია, მათგან საუკეთესო კი ჩერნოგორიის ნაკრების ცენტრი ნიკოლა ვუჩევიჩი იყო. მის ანგარიშზე დაბლ-დაბლია – 12 ქულა, 12 მოხსნა.

როგორც აღვნიშნეთ, “მილუოკიმ” 50 მარცხის ფონზე მე-13 გამარჯვება იზეიმა, თუმცა, კვლავაც ლიგის უარეს გუნდად რჩება და აღმოსავლეთ კონფერენციაში უახლოეს მეტოქე “ფილადელფიას” 2 გამარჯვებით ჩამორჩება.

“ბაქსი” მომდევნო 8 მატჩიდან შვიდს სტუმრად ჩაატარებს, რომელთაგან უახლოესს 12 მარტის დილას მინესოტაში “ტიმბერვულვზთან” ჩაატარებს. ამავე დღეს თორნიკე შენგელიას “ჩიკაგო ბულზი” “სან ანტონიო სპურზს” უმასპინძლებს.

მილუოკი – ორლანდო 105:98 (13:24, 32:27, 23:20, 37:27)

მილუოკი: ნაიტი (24 ქ. 6 პ.), მიდლტონი (21 ქ. 7 პ.), ილიასოვა (16 ქ. 11 მ.), უოლტერსი (8 ქ.), ფაჩულია (4 ქ.); სეშნსი (16 ქ. 8 პ.), ჰენსონი (10 ქ. 8 მ.), ანტეკოუნმპო (6 ქ.), მაიო, ედრიენი.

ორლანდო: ჰარკლესი (14 ქ.), ნელსონი (13 ქ. 7 პ.), აფლალო (12 ქ.), ვუჩევიჩი (12 ქ. 12 მ.), ო’ქუინი (10 ქ. 7 მ.); ოლადიპო (12 ქ.), ჰარისი (11 ქ. 8 მ.), მური (8 ქ.), ნიკოლსონი (6 ქ.), ლემბი.