4 სექტემბერს სლოვენიაში საკალათბურთო ციებ-ცხელება დაიწყება. ქართველ ქომაგებს სანერვიულო აშკარად ექნებათ - ჩვენი ნაკრები ევროპის ჩემპიონატზე ზედიზედ მეორედ იასპარეზებს. საქართველოს ნაკრები ევრობასკეტ 2013-ის პირველ მატჩს, 4 სექტემბერს, ცელიეში თბილისის დროით 16:30-ზე პოლონეთის წინააღმდეგ გამართავს.

სლავთა ნაკრები ჩვენი გუნდისთვის ნაცნობი მეტოქეა. პირველი ოფიციალური შეხვედრა 1995 წელს შედგა. ევროპის ჩემპიონატის შესარჩევ ეტაპზე, ბირმინგემში შეხვედრა სლავთა სასარგებლოდ 91:68 დასრულდა. 2011 წლის ევროპის ჩემპიონატის შესარჩევ ეტაპზე გუნდები ერთმანეთს ორჯერ შეხვდნენ. პირველ მატჩში საქართველომ პოლონეთი 84:65 გაანადგურა, მეორე შეხვედრაში პოლონეთის ნაკრებმა მცირე უპირატესობით დაგვამარცხა - 67:58.

2013 წლის ევროპის ჩემპიონატის მოსამზადებელ ეტაპზე ნაკრებები იტალიაში ამხანაგურად გაეჯიბრნენ და პოლონეთმა 87:75 მოგვიგო.

პოლონეთის ნაკრებს ორი გამოცდილი ლიდერი ჰყავს: მარცინ გორტატი (“ფინიქსი”, NBA) და მაცეი ლამპე (“ბარსელონა”, ესპანეთი). ზაზა ფაჩულიას არყოფნაში გიორგი შერმადინი ცენტრში სწორედ გორტატის განეიტრალებას შეეცდება.

საქართველომ და პოლონეთმა ევრობასკეტ 2013-ის მოსამზადებელ ეტაპზე 10 ამხანაგური შეხვედრები ჩაატარეს. ქართველებმა 4 მოიგეს 6 კი წააგეს. პოლონეთს ამ მხრივ დადებითი ბალანსი აქვს 6-4.

საქართველო - პოლონეთის მატჩი “ცელიე არენაზე” გაიმართება, რომელიც 5200 მაყურებელს იტევს.

უკვე ცნობილია საქართველოს და პოლონეთის 12-კაციანი შემადგენლობები:

პოლონეთის ნაკრები: მარცინ გორტატი, მაცეი ლამპე, ლუკაშ კოჟარეკი, კჟიშტოფ ჟუბარგა, პრემისლავ ზამოისკი, მიხალ ჩილინსკი, მატეუჟ პონიტკა, ტომას კელატი, ადამ ვაჟინსკი, მიხალ იგნერსკი, პრემისლავ კარნოვსკი, ადამ ხრიშანიუკი.

მწვრთნელი: დირკ ბაუერმანი

საქართველო: ვიქტორ სანიკიძე, გიორგი შერმადინი, მანუჩარ მარკოიშვილი, გიორგი ცინცაძე, რიკი ჰიკმანი, ნიკოლოზ ცქიტიშვილი, ლევან ფაცაცია, ბექა ბურჯანაძე, ბესო ლეჟავა, დუდა სანაძე, ნიკა მეტრეველი და ოთარ ფხაკაძე.

მწვრთნელი: იგორ კოკოშკოვი

გიორგი ბალახაძე

ევრობასკეტ-2013-ს წარმოგიდგენთ ონლაინ-ტოტალიზატორი TBILISIBET.COM და სპორტული ეკიპირების ესპანური ბრენდი “ჯომა”