საინტერესო ეპიზოდი დაფიქსირდა ესპანეთის და სენეგალის საკალათბურთო ნაკრებთა მატჩში. მსოფლიო ჩემპიონატის ამ მერვედფინალურ შეხვედრაში გამარჯვებულის ვინაობა წინდაწინვე გარკვეული გახლდათ, თუმცა კი, მსაჯები მასპინძლებს დამატებით 2 ქულითაც წაეხმარნენ.
საქმე ეხება პაუ გასოლთან დაკავშირებულ მომენტს, როდესაც მისი ნასროლი ბურთი კალათში ქვევიდან ავარდა და შემდეგ ისევ ბადეში ჩაეშვა, არბიტრებმა კი 2 ქულის ჩავარდნა დააფიქსირეს და ესპანელ კალათბურთელს ბონუს-ჯარიმაც ასროლინეს. განმეორებაზე ამ ეპიზოდის აბსურდულობა თვალნათლივ სჩანდა, თუმცა, მსაჯებს გადაწყვეტილება არ შეუცვლიათ.
შეგახსენებთ, რომ ესპანელებმა გასული თამაში 89:56 მოიგეს და მეოთხედფინალში საფრანგეთს ეთამაშებიან.
