საქართველოს ეროვნულ ნაკრებს, ესპანეთთან მსოფლიოს 2014 წლის საფეხბურთო ჩემპიონატის შესარჩევი მატჩის წინ, ტრავმირებული ალექსანდრე ამისულაშვილისა და თორნიკე ოქრიაშვილის შემდეგ, ჯანო ანანიძეც გამოაკლდა.  

საქართველოს ფეხბურთის ფედერაციის ვებგვერდის ინფორმაციით, “როსტოვის” ნახევარმცველის არყოფნის მიზეზი, არა ტრავმა, არამედ პირადი  პრობლემაა. ჰოლანდიის ახალგაზრდულ ნაკრებთან გამართული მატჩის შემდეგ, ანანიძეს ოჯახთან დარჩენა მოუწია.

შექმნილი  სიტუაციიდან გამომდინარე, ფეხბურთელმა მიზანშეწონილად მიიჩნია განმარტების გაკეთება და ფედერაციის ვებგვერდს მცირე კომენტარი მისცა.

“ძალიან რთული ოჯახური ვითარება შემექმნა და ამიტომ, რამდენიმე დღით საქართველოში დარჩენა მომიწია. მე არ მივეკუთვნები იმ კატეგორიას, რომელსაც შეუძლია უმნიშვნელო მიზეზის გამო უარის თქმა ეროვნულ ან ახალგაზრდულ ნაკრებში გამოძახებაზე. ეს არც აქამდე გამიკეთებია და არც მომავალში ვაპირებ. მითუმეტეს, რომ გულშემატკივრებისგანაც ყოველთვის ვგრძნობ დიდ სითბოს და სიყვარულს. ნაკრების მაისურით თამაში ჩემთვის ყველაზე დიდი ბედნიერება და პატივია, თუმცა, დღეს ჩემი ოჯახი განსაცდელშია და ვალდებული ვარ მის გვერდით ვიყო. მინდა, კიდევ ერთხელ ხაზი გავუსვა იმას, რომ ჩემი საქართველოში დარჩენის ერთადერთი მიზეზი ოჯახური მდგომარეობაა”.

საქართველოს ეროვნული საფეხბურთო ნაკრები, წლის ბოლო ოფიციალური მატჩისთვის უკვე ორი დღეა ქალაქ ალბასეტეში ემზადება.

ესპანეთთან შეხვედრისთვის თემურ ქეცბაიამ გუნდი 8 ოქტომბერს შეკრიბა. ამ დროისთვის, ნაკრები ალბასეტეში 20 კაციანი შემადგენლობით იმყოფება. გუშინ, გუნდმა საფეხბურთო კლუბ “ალბასეტეს” საწვრთნელ ბაზაზე ორჯერ ივარჯიშა. ესპანეთში მყოფი ყველა ფეხბურთელი ჯანმრთელადაა და მსოფლიოსა და ევროპის მოქმედ ჩემპიონთან მატჩს სრულად მომზადებული ხვდება. სავიზო პრობლემების მოგვარების შემდეგ, ნაკრებს დღის ბოლოს ბაქოს “ინტერის” ფეხბურთელი ბაჩანა ცხადაძე და ფამაგუსტას “ანორთოსისის” წევრი შოთა გრიგალაშვილი შეურთდებიან.

ესპანეთთან გამოძახებული მოთამაშეების 22- კაციანი სია ამ დროისთვის ასე გამოიყურება:

მეკარეები: გიორგი ლორია („დინამო“ თბილისი), ნუკრი რევიშვილი („დილა“, გორი), როინ კვასხვაძე („ზესტაფონი“).

მცველები: უჩა ლობჟანიძე („დნიპრო“, უკრაინა), აკაკი ხუბუტია („მორდოვია“, რუსეთი), გურამ კაშია („ვიტესი“, ჰოლანდია), გიორგი ხიდეშელი („ტორპედო“, ქუთაისი), დავით კვირკველია („დინამო“ თბილისი), გულვერდ თომაშვილი, ალექსანდრე კვახაძე (ორივე „დილა“, გორი), გიორგი ფოფხაძე („იაგელონია“, პოლონეთი), მათე ღვინიანიძე („სევასტოპოლი“, უკრაინა).

ნახევარმცველები: ლევან ხმალაძე, ირაკლი ძარია, ელგუჯა გრიგალაშვილი (სამივე „დინამო“ თბილისი), ალექსანდრე კობახიძე („დნიპრო“, უკრაინა), შოთა გრიგალაშვილი („ანორთოსისი“, კვიპროსი), ავთანდილ ებრალიძე („ჟილ ვისენტე“, პორტუგალია).

თავდამსხმელები: ვლადიმერ დვალიშვილი („ლეგია“, პოლონეთი), ნიკოლოზ გელაშვილი („ყარაბაღი“, აზერბაიჯანი), ბაჩანა ცხადაძე („ინტერი“ ბაქო, აზერბაიჯანი), ირაკლი მოდებაძე („დილა“, გორი).

შეგახსენებთ, რომ დისკვალიფიკაციის გამო,  ესპანეთთან მატჩს ჯაბა კანკავა, დავით თარგამაძე და გია გრიგალავა გამოტოვებენ.

ესპანეთისა და საქართველოს საფეხბურთო დაპირისპირება  15 ოქტომბერს, თბილისის დროით 23:00 საათზე დაიწყება. შეხვედრის რეპორტაჟს ქალაქ ალბასეტედან საზოგადოებრივი მაუწყებლის პირველი არხი პირდაპირ ეთერში შემოგთავაზებთ.

მატჩს გერმანელ მსაჯთა ბრიგადა მოემსახურება. მთავარი მსაჯი ფლორიან მეიერი იქნება.