საფრანგეთის ლიგა ერთში მოთამაშე “მონაკოს” კაპიტანი ერიკ აბიდალი ადგილობრივ საავადმყოფოშია გადაყვანილი, მაგრამ გავრცელებული ინფორმაციით, მას ჯანმრთელობასთან დაკავშირებით სერიოზული პრობლემები არ აქვს და ფეხბურთელის საწვრთნელ ბაზაზე დაბრუნება ხვალისთვის იგეგმება.
აბიდალმა “მონაკოს” ბოლო თამაში გრიპის გამო გააცდინა. ცნობილი გახდა, რომ წამლებმა, რომლებსაც ფეხბურთელი მკურნალობის დროს იყენებდა, მას პირიქით, ავნეს და ამის გამო გახდა მისი საავადმყოფოში გადაყვანა საჭირო.
“მონაკოს” ოფიციალური ვებგვერდის ცნობით, აბიდალის საავადმყოფოში გადაყვანა მხოლოდ თავის დაზღვევის მიზნით მოხდა, ვინაიდან ბოლო წლებში, მას ჯანმრთელობასთან დაკავშირებით სერიოზული პრობლემები ჰქონდა.
შეგახსენებთ, რომ გასული 3 წლის განმავლობაში, აბიდალმა სიმსივნით დაავადებულ ღვიძლზე ორი ოპერაცია გაიკეთა.
