ძიუდოს საერთაშორისო ფედერაციამ ახალი რეიტინგ-სია გამოაქვეყნა, რომელშიც თბილისის მსოფლიოს თასის შედეგებიცაა შეტანილი. მასპინძელთა წარმატებული გამოსვლა ცხადია რეიტინგზეც აისახა, მაგრამ თუ რამდენიმე გამონაკლისს არ ჩავთვლით, ცხრილში დიდი ნახტომის გასაკეთებლად ეს მედლიანობაც არ აღმოჩნდა საკმარისი.
2009-2010 წლების საერთაშორისო ტურნირების დაჯამებით, საქართველოს ნაკრების წევრთაგან ერთ-ერთი საუკეთესო ისევ ამირან პაპინაშვილია - 60 კილოგრამში მე-10 პოზიციაზე იმყოფება. ამირანს 2009 წლის თბილისის მსოფლიოს თასის ჩემპიონობისთვის მიღებული 100 ქულა, წესის თანახმად, გაუნახევრდა, მაგრამ წლევანდელი ბრინჯაოსთვის 40 შეიმატა და ერთიანობაში 358 ქულას მოუყარა თავი. ამავე წონაში, ბეთქილ შუკვანმა ახალი სეზონი ვერცხლის მედლით გახსნა. მან 60 ქულა აიღო და 17 საფეხურით დაწინაურდა. დავით ასუმბანი აქამდე რეიტინგში საერთოდ არ იყო, მაგრამ ერთი კვირის წინანდელი მსოფლიოს თასის ჩემპიონობისთვის აღებული 100 ქულით უმალ 41-ე ადგილზე დამკვიდრდა. წელს შეაბიჯა რეიტინგში პაატა მერებაშვილმაც, თბილისური მე-5 ადგილისთვის მიღებული 20 ქულით.
66 კილოგრამში, მსოფლიოს თასის ჩემპიონმა შალვა ქარდავამ 35-ადგილიანი პროგრესი განიცადა. ამჟამად იგი 23-ე საფეხურზე დგას. სამაგიეროდ, ნესტორ ხერგიანი 30 პოზიციით დაქვეითდა. შეგახსენებთ, საქართველოს ყველაზე უხვტიტულა ძიუდოისტი სპორტის სასახლეში პირველსავე წრეში დამარცხდა და უქულოდ დარჩა. 73-ში, ზაზა კედელაშვილი 25-ე ადგილს იკავებს. ამ წონის რეიტინგში ანზორ ხმიადაშვილმა, გიორგი დილებაშვილმა და ნუგზარ ტატალაშვილმაც შეაბიჯეს, მაგრამ ჯერჯერობით არც ერთ მათგანს აქტივში ქულა არ მოეპოვება.
როგორც ცნობილია, მსოფლიოს თასზე მასპინძლებმა ყველაზე შედეგიანად 81 კილოგრამში იჭიდავეს. ნაკრების ოთხივე წევრი კვარცხლბეკზე ავიდა და ეს მედლიანობა რეიტინგზეც აისახა. ჩემპიონობამ და 100-მა ქულამ ლევან წიკლაური 5 ადგილით წინ წასწია. ამჟამად იგი მე-15 პოზიციაზეა. 29-ედან 22-ე ადგილამდე აინაცვლა ვერცხლის პრიზიორმა ხვიჩა ხუციშვილმა. ბრინჯაოსნები - იოსებ წელაური და დავით კარბელაშვილი კი აქამდე რეიტინგში საერთოდ არ იყვნენ და უმალ 80-ეულში გაწევრიანდნენ.
90-ში, ვარლამ ლიპარტელიანს შარშანდელი თბილისის მსოფლიოს თასის ჩემპიონობისთვის მიღებული 100 ქულა გაუნახევრდა და რადგან წლეულს სულ უქულოდ დარჩა, რეიტინგი გაიუარესა, მაგრამ სულ რაღაც 2 ადგილით. ახალმა ოქროსმედალოსანმა მინდია ბოდაველმა კი 48-ე საფეხურიდან 23-მდე აინაცვლა. საბა გავაშელიშვილმა და ლაშა გურულმა 16-16 ქულით ასეულში შეაბიჯეს.
100 კილოგრამში მოჭიდავე ლევან ჟორჟოლიანი ამირან პაპინაშვილთან ერთად, საუკეთესო რეიტინგიანი ქართველი ძიუდოისტია. მართალია იგი ამჯერად სპორტის სასახლის ტატამზე საერთოდ არ გასულა, მაგრამ ათეულში ადგილი მაინც შეინარჩუნა. ამ წონის ვერცხლის პრიზიორი რევაზ ჩიკოიძე კი რეიტინგში აქამდე საერთოდ არ მოიხსენიებოდა და მეორე ადგილისთვის დარიცხულმა 60-მა ქულამ 53-ე ადგილზე დაამკვიდრა. საგრძნობი პროგრესი განიცადეს ბრინჯაოს პრიზიორებმა დავით ლორიაშვილმა და ნოდარ მეტრეველმაც. მძიმე წონაში ზვიად ხანჯალიაშვილი, ადამ ოქრუაშვილი და ლაშა გუჯეჯიანი ახალ რეიტინგში 30-ეულში იმყოფებიან, დაახლოებით იმავე პოზიციებზე, რომლებსაც ერთი კვირის წინ იკავებდნენ. მსოფლიოს რეიტინგის მოწინავე ხუთეულებს და ყველა ქართველის ამჟამინდელ მდგომარეობას აქვე გთავაზობთ.

ოთარ მაღლაკელიძე

60 კგ
1 ჰიროაკი ჰირაოკა (იაპონია)        980
2 გიორგი ზანთარაია (უკრაინა)        884
3 რიშოდ სობიროვი (უზბეკეთი)        812
4 ლუდვიგ პაიშერი (ავსტრია)        700
5 მასააკი ფუკუოკა (იაპონია)        640
10 ამირან პაპინაშვილი            358
21 ნესტორ ხერგიანი            212
40 ბეთქილ შუკვანი                  104    
41 დავით ასუმბანი                100
55 ლევან ჩუბინიძე                70
92 სოსო ნიჟარაძე                28
98 პაატა მერებაშვილი            20

66 კგ
1 ცაგაანბაატარ ხაშბაატარი(მონღოლეთი)    1140
2 ალიმ გადანოვი (რუსეთი)            812
3 სუგოი ურიარტე (ესპანეთი)            796
4 მიკლოშ უნგვარი (უნგრეთი)            700
5 სანიასურენ მიარაგჩა (მონღოლეთი)        672
23 შალვა ქარდავა                    172
68 ზაზა კედელაშვილი                60
97 სანდრო იაკობაშვილი                32
98 ნესტორ ხერგიანი                    30
105 გიორგი ფერსაშვილი                26
117 მიხეილ ხომიზური                20
134 მინდია ხომიზური                    8

73 კგ
1 კი-ჩუნ ვანი (სამხრეთ კორეა)        1480
2 დირკ ვან ტიჩელტი (ბელგია)        1006
3 გუი-მან ბანგი (სამხ. კორეა)        980
4 მანსურ ისაევი (რუსეთი)            800
5 ჟილ ბონომი (საფრანგეთი)        552
25 ზაზა კედელაშვილი            170
59 დავით ქევხიშვილი            60
62 დავით კუპრაშვილი            60
68 თენგიზ პაპოშვილი            56
68 თენგიზ პაპოშვილი            56
68 მიხეილ ხომიზური            56
145 ამბაკო ავალიანი            8
177 ანზორ ხმიადაშვილი            0
177 გიორგი დილებაშვილი            0
177 ნუგზარ ტატალაშვილი            0

81 კგ
1 ივან ნიფონტოვი (რუსეთი)        1180
2 ჯაე-ბუმ კიმი (სამხრეთ კორეა)        1140
3 სერგეი შუნძიკაუ (ბელარუსი)        700
4 დაე-ნამ სონგი (სამხრეთ კორეა)        600
5 ოლე ბიშოფი (გერმანია)            556
15 ლევან წიკლაური                294
22 ხვიჩა ხუციშვილი            218
80 იოსებ წელაური                40
80 დავით კარბელაშვილი            40
92 გრიგოლ შინჯიკაშვილი            32
101 საბა გავაშელიშვილი            22
127 გიორგი ბაინდურაშვილი        8

90 კგ
1 ტაკაში ონო (იაპონია)            1240
2 კირილ დენისოვი (რუსეთი)        1000
3 დილშოდ ჩორიევი (უზბეკეთი)        788
4 კიუ-ვონ ლი (სამხრეთ კორეა)        736
5 ჰეშამ მესბაჰი (ეგვიპტე)            700
18 ვარლამ ლიპარტელიანი            222
27 მინდია ბოდაველი            170
40 ზვიად გოგოჭური            100
52 გრიგოლ მამრიკიშვილი            70
96 საბა გავაშელიშვილი            16
96 ლაშა გურული                16


100 კგ
1 ტაკამასა ანაი (იაპონია)            1280
2 ჰი-ტაე ჰვანი (სამხრეთ კორეა)        1048
3 მაქსიმ რაკოვი (ყაზახეთი)        840
4 რამადან დარვიში (ეგვიპტე)        820
5 ელკო ფან დერ ხესტი (ჰოლანდია)    600
10 ლევან ჟორჟოლიანი            408
41 ირაკლი ცირეკიძე            84
43 დავით ლორიაშვილი            80
46 ნოდარ მეტრეველი            76
53 რევაზ ჩიკოიძე                60
98 დიმიტრი ტურაშვილი            8

+100 კგ
1 ტედი რინერი (საფრანგეთი)        1200
2 აბდულო ტანგრიევი (უზბეკეთი)        760
3 კეიჯი სუძუკი (იაპონია)            728
4 მარტინ პადარი (ესტონეთი)        620
5 ისლამ ელ შეჰაბი (ეგვიპტე)        600
20 ზვიად ხანჯალიაშვილი            270
22 ადამ ოქრუაშვილი            258
27 ლაშა გუჯეჯიანი                146
58 ნოდარ მეტრეველი            40
80 გიგა გუბელაძე                16