საქართველოს 21 წლამდე ფეხბურთელთა ნაკრების მთავარმა მწვრთნელმა ალექსანდრე ჩივაძემ, ევროპის 2015 წლის ჩემპიონატის შესარჩევ ციკლში 10 ოქტომბერს ჰოლანდიასთან და 14 ოქტომბერს შოტლანდიასთან საშინაო მატჩებისთვის ნიკა ძალამიძის მაგივრად შეკრებაზე მარტვილის “მერანის” შემტევი აკაკი შულაია გამოიძახა. ამის შესახებ საქართველოს ფეხბურთის ფედერაციის ვებგვერდი იუწყება.

სამშაბათ საღამოს, საქართველოს ფეხბურთის ფედერაციაში პოლონური ბიალისტოკის “იაგელონიადან” ოფიციალური წერილი მოვიდა, სადაც სათქვამია:

“უპირველესად, მადლობას გიხდით ჩვენი ფეხბურთელის ნიკა ძალამიძის 21-წლამდელთა ნაკრებში გამოძახებისთვის. თუმცა, გვინდა გაცნობოთ, რომ ნიკამ ახლახან დაამთავრა ხანგრძლივი მკურნალობა მძიმე ტრავმის შემდეგ. ფეხბურთელი ახლაც ექიმებისა და თერაპევტის მეთვალყურეობის ქვეშ იმყოფება. ამავდროულად, ის უკვე ვარჯიშობს გუნდთან ერთად და თამაშიც დაიწყო, მაგრამ მას კიდევ სჭირდება დრო ფორმის სრულად აღსადგენად. ამიტომ, გთხოვთ, გააუქმოთ მისი გამოძახება მოახლოებული ორი თამაშისთვის. კიდევ ერთხელ შეგახსენებთ, რომ ძალამიძეს მეტი დრო სჭირდება აღდგენისთვის და დარწმუნებულები ვართ, რომ ნაკრებში მომდევნო გამოძახებისთვის ის სრულ მზადყოფნაში იქნება”.

აქედან გამომდინარე, ახალგაზრდული ნაკრების მთავარმა მწვრთნელმა გადაწყვიტა, ნაკრებში გამოძახების შესახებ გუშინვე ეცნობებინა მარტვილის “მერანის” 17 წლის შემტევისთვის აკაკი შულაიასთვის. შესაბამისად, კლუბში ოფიციალური გამოძახება გაიგზავნა.

ალექსანდრე ჩივაძემ აკაკი შულაია გაზაფხულზე, გიორგი დევდარიანის 17-წლამდელთა ნაკრების შემადგენლობაში ნახა და მას შემდეგ, მხედველობის არეში სულ ჰყავდა. ახლა კი, ნაკრების თავკაცმა 17 წლის ფეხბურთელს უკვე თავისთან უხმო, რაც, თავისთავად, დიდი ნდობის გამოცხადებაა.