ლადო დვალიშვილი ზედიზედ მეორედ გახდა პოლონეთის ჩემპიონი. ბოლოდან მესამე ტურში "ლეგიას" ჯერ არ უთამაშია, მაგრამ საქმე ისაა, რომ მდევარმა "ლეხმა" "პოგონს" ვერ მოუგო (0:0) და "ლეგიას" ვერანაირად ვეღარ დაეწევა. "ლეხს" 2 მატჩი დარჩა სათამაშო, "ლეგიას" კი – სამი. მათ შორის სხვაობა კი 7 ქულაა.

დვალიშვილმა მშვენივრად ჩაატარა სეზონის პირველი ეტაპი, წლეულს კი სათამაშო პრაქტიკა აკლდა და დიდია იმის ალბათობა, რომ ზაფხულში კლუბი შეიცვალოს. ლადომ მიმდინარე ჩემპიონატში 21 მატჩი ჩაატარა და 10 გოლი გაიტანა.

დვალიშვილისთვის ეს კარიერაში მეხუთე საჩემპიონო ტიტულია. ორჯერ საქართველოში (ჯერ თბილისის "დინამოში", შემდეგ რუსთავის "ოლიმპში"), ერთხელ ისრაელში (ჰაიფას "მაქაბი") და ორჯერ პოლონეთში.

აქვე ვთქვათ, რომ "ლეგია" მეათედ გახდა პოლონეთის ჩემპიონი.