ლელა ჯავახიშვილმა (2464) ჩინურ ვუსიში მიმდინარე პრესტიჟულ ტურნირზე პირველი გამარჯვება იზეიმა. საწყის ტურებში დაფიქსირებული ყაიმის და მარცხის კვალად, მე-3 პარტიაში ქართველი მოჭადრაკე თეთრი ფიგურებით მასპინძელ იუე ვანგს (2401) დაუპირისპირდა და 45-ე სვლაზე იმარჯვა.

ამგვარად, ჯავახიშვილმა თავი 1.5 ქულას მოუყარა და China 3th Chess Women Masters Touamenrnt-ზე დამატებითი მაჩვენებლებით მე-7 ადგილზე დამკვიდრდა. ლელას დარი მონაგარი კიდევ სამ მოჭადრაკეს გააჩნია, პირველ ადგილზე ჩინელი ჟონგი ტანია (2483) 2.5 ქულით, მას კი რუსი ვალენტინა გუნინა (2514) და ვენჯუნ ჟუ (2544) მიჰყვებიან 2.0-2.0 ქულით.

მე-4 ტურში, რომელიც 3 ივნისს შედგება, ჯავახიშვილი შავებით სწორედ გალიდერებულ ტანს ეთამაშება. აქვე ვთქვათ, რომ ვუსის ტურნირი 9 ტურად მიმდინარეობს და 9 ივნისს დასრულდება.