“როსტოვის” შემტევმა ნახევარმცველმა ჯანო ანანიძემ კლუბის ოფიციალურ ვებგვერდთან ინტერვიუში განაცხადა, რომ რუსეთის პრემიერლიგის სტარტზე “ტერეკთან” გამარჯვების ბოლო წუთამდე სჯეროდა.

- რთული იყო “ტერეკის” წინააღმდეგ მატჩში ჩართვა, როდესაც მეორე ტაიმის მსვლელობისას პოლოზი შეცვალეთ?

- იმ მომენტისთვის სტუმრებმა ხელთ იგდეს ინიციატივა, რომელსაც შესვენებამდე ჩვენ ვფლობდით. თუმცა, ამის შესახებ არ მიფიქრია. მთლიანად იმაზე ვიყავი გადართული, რომ “როსტოვში” დებიუტი მქონდა და როგორც სამწვრთნელო შტაბის, ასევე გულშემატკივრები იმედი უნდა გამემართლებინა.

- ღელავდით?

- ძალიან. თან, თითქოს სპეციალურად, გოლიც გავუშვით. მით უმეტეს, ამ ეპიზოდში მეც ვმონაწილეობდი. ბურთი “ამომქონდა” და მეტოქეს სახეში მოვარტყი – რიკოშეტი, შეტევა ჩვენს კარზე და პენალტი. “ტერეკი” დაწინაურდა, მაგრამ სულით არ დავცემულვართ და მატჩი სასურველი შედეგით დავასრულეთ.

- როდესაც ძიუბამ საპასუხო გოლი გაიტანა, გჯეროდათ, რომ მოგებაც შეგეძლოთ?

- იმ მომენტში ტაბლოს შევხედე და კიდევ 5 წუთი გვრჩებოდა სათამაშოდ. ვიგრძენი, რომ გროზნოელების დამარცხება შეგვეძლო. ეს მოვახერხეთ კიდეც, რადგან ბიჭები მატჩის პირველიდან ბოლო წამამდე გამარჯვებისთვის იბრძოდნენ.

- ძიუბასთვის გაკეთებული საგოლე პასი მიზანმიმართული იყო?

- დიახ. როდესაც კანგამ საჯარიმო მოედნიდან ბურთი ფლანგზე გადმომაწოდა, თავი ავწიე, დავინახე, რომ ძიუბა მეტოქის კარისკენ გარბოდა და შევეცადე, ისეთი პასი მიმეცა, რომ მას თავით კარგად დაერტყა. ძიუბამ ყველაფერი საუცხოოდ შეასრულა.

- საერთო ჯამში, საკუთარ დებიუტს როგორ შეაფასებდით?

- დასაწყისისთვის არცთუ ცუდად ვითამაშე – საკუთარ თავს სამს პლუსით დავუწერდი.

- როსტოვში ცხელა, თქვენს მშობლიურ ქობულეთში როგორი ამინდია?

- ახლა იქაც პლუს 35 გრადუსია. უბრალოდ, ქობულეთში ხალხი ზღვაზე ისვენებს, ხოლო ჩვენ აქ ვმუშაობთ. სიცხის მიუხედავად, ამას სიამოვნებით ვაკეთებ, რადგან ფეხბურთი ძალიან მიყვარს.