დიდიე დეშამი საფრანგეთის ნაკრებს მინიმუმ 2016 წლამდე უხელმძღვანელებს. ამის შესახებ ფრანგულ სპორტულ გამოცემებს ფედერაციის პრეზიდენტმა ნოელ ლე გრაემ უკრაინასთან ჩატარებული პლეი-ოფის საპასუხო მატჩის დასრულებისთანავე აცნობა. შეხვედრა დეშამის გუნდმა 3:0 მოიგო, ორი თამაშის ჯამში 3:2 იმარჯვა და მსოფლიოს 2014 წლის ჩემპიონატის საგზური მოიპოვა.

“დიდიე დეშამს სრულ ნდობას ვუცხადებ. მოქმედ კონტრაქტს ვადა მსოფლიო ჩემპიონატის დასრულების შემდეგ ეწურება, მაგრამ უკვე გადაწყვეტილია, რომ საფრანგეთის ნაკრებს ევროპის 2016 წლის ჩემპიონატისთვისაც ეს მწვრთნელი მოამზადებს” – განაცხადა ნოელ ლე გრაემ.

ფრანგული გამოცემებისვე ცნობით, რომ არა პლეი-ოფის დაძლევა, დეშამი თანამდებობის დატოვებას აპირებდა.